د طالبانو د محکمو د جزايي اصول نامې ته د غبرګونو پر دوام، د افغان ښځو د همت غورځنګ غړو ویلي، دا اصول نامه له انساني کرامت، بشري حقونو او اسلامي عدالت سره په ټکر کې ده.
رخشانه: د دې غورځنګ غړو نن (یکشنبې د سلواغې ۱۲ مه) په یوه اعلامیه کې د طالبانو د محکمو جزايي اصول نامه یو «غیرمشروع، تپل شوی، تبعیض کوونکی او له بشري حقونو سره په ټکر کې سند» وباله.
د افغان ښځو د همت غورځنګ په خپله اعلامیه کې لیکلي، دا اصول نامه «د ښځو او غیر طالب وګړو په وړاندې په منظمه توګه د تبعیض رسمي کول دي، چې انساني خپلواکۍ یې په طبقاتي توګه محدودې کړې او د قانون په وړاندې برابري یې له منځه وړې ده.»
معترضو ښځو ویلي، د طالبانو د محکمو په جزايي اصول نامه کې «د سزاوو ډول او شدت د جرم د ماهیت پر بنسټ نه، بلکې د ټولنیز مقام او افرادو د جنسیت پر بنسټ ټاکل کېږي. دا کړنلارې عدالت د ټولو لپاره د طبقاتي امتیاز د اصل په توګه تبدیل کړی دی.»
هغوی همدارنګه دغه اصول نامه د نړیوالو اسنادو څخه ښکاره سرغړونه وبلله او د هغې د تبعیض برخو د ژر تر ژره لغوه کولو او د یوې خپلواکې، بې پرې او پر عدالت او برابرۍ ولاړې بیا کتنې غوښتنه یې وکړه.
یاد غورځنګ له نړیوالې ټولنې او د بشري حقونو له بنسټونو غوښتي، چې د دې بې عدالتۍ او جوړښتي تبعیض په وړاندې چوپ نه شي او په افغانستان کې د ښځو له انساني کرامت او عدالت پر وړاندې خپل عملي او فوري مسوولیت تر سره کړي.
د طالبانو د محاکمو جزايي اصول نامه تازه د دې ډلې د مشر هبت الله اخوندزاده له خوا توشېح شوې ده. په دې سند کې، د مذهبي لږکیو په وړاندې تبعیض او د ټولنې د وګړو د بنسټیزو خپلواکیو، له هغې جملې، انساني کرامت، د بیان د آزادۍ او فکر ماتونه، خپل سرې نیونې او سزاوې رسمي او قانوني شوې دي.
د طالبانو د محکمو د جزايي اصول نامې د منځپانګې توشېح او غیر رسمي خپرېدو د بشري حقونو بنسټونو او نړیوال بنسټونو تر منځ پراخ غبرګونونه راپارولي دي. د بشري حقونو فعالانو دا قانون د نړیوالو کړنلارو او اصولو خلاف بللی ویلي یې دي، طالبان د دې قانون په توشېح کولو سره خپل جرمونو ته د مشروعیت ورکولو په لټه کې دي.
