افغانستان کې د ملګرو ملتونو د سیاسي استازولۍ دفتر (یوناما) وايي، په دغه هېواد کې د ماینونو او ناچاودو توکو ۸۰ سلنه قربانیان ماشوم دي
رخشانه: دې بنسټ نن (سه شنبې د سلواغې ۱۴ مه) په خپله فسبوک پاڼه د یوه پوسټ په خپرولو سره لیکلي، د ناچاودو توکو د مرګ ژوبلې له پلوه، افغانستان په نړۍ کې درېیم هېواد ګڼل کېږي.
یاد دفتر زیاته کړې، لا هم د افغانستان په ګوټ ګوټ کې د جګړو پاتې شوي ماینونه او ناچاودي توکي په پراخه کچه شتون لري.
دې بنسټ ټینګار کړی، چې په افغانستان کې د ماینونو او ناچاود توکو ۸۰ سلنه قربانیان ماشومان دي او هغوی تر ډېره د ناچاودو توکو سره د لوبو پر مهال د اړیکې نیولو له آمله ټپیان یا یې خپل ژوند له لاسه ورکړی دی.
ملګرو ملتونو د ماین پاکولو برخه کې د غیردولتي بنسټونو سره د مرستې کولو غوښتنه کړې ده.
دې بنسټ ټينګار کړی، چې پوهاوی او ټولیز اقدام کولی شي د خلکو ژوند وژغوري.
د جګړې د مهال ناچاودي توکي، ماینونه او پاتې شوي جګړیز وسایل ټول هر کال د هېواد د سلګونو وګړو په ځانګړې توګه د ماشومانو او ښځو ژوند اخلي.
د «هلو ترست» ماین پاکۍ موسسې تېر کال په یوه راپور کې لیکلي چې په افغانستان کې هره میاشت کابو ۵۰ تنه له جګړې د پاتې ماینونو او ناچاودنو توکو په چاودنو کې وژل کېږي او ټپیانېږي.
د دې بنسټ په راپور کې راغلي وو، په افغانستان کې شاوخوا ۶.۴ میلیونه وګړي د ناچاودو توکو د چاودنو له ګواښ سره مخ دي.
