په ملګرو ملتونو کې د افغانستان پخوانی سفیره عادله راز، د ۲۰۲۶ – ۲۰۳۰کلونو لپاره د ملګرو ملتونو د څو اړخیزه زیان مننې شاخص لپاره، د متخصصینو د خپلواک مشورتي پلاوي غړې شوه.
رخشانه: مېرمن راز په دې وروستیو کې، د ملګرو ملتونو د سرمنشي انتونیو ګوترش له خوا د دې مشورتي پلاوي غړیتوب تر لاسه کړ.
ملګرو ملتونو په اعلامیه کې لیکلي، دا پلاوی د څو اړخیزه زیان مننې شاخص (MVI) د پیاوړتیا او د پرمختللو هېوادونو د جوښتي زیان مننې د لاسوندونو پر بنسټ ارزونې چمتو کولو په موخه جوړ شوی دی.
د اعلامیې له مخې د پلاوي غړي به په هرو دریو کلونو کې په خپلواکه توګه د شاخص بیا کتنه، د هېوادونو پرمختګ څارنه او د پالیسۍ سپارښتنې چمتو کولو کې کلیدي رول ولوبوي.
د دې پلاوي په غړو کې د بېلا بېلو هېوادونو ۱۵ متخصصین شامل دي، چې په اقتصادي، ټولنیز، چاپېریالي او انعطاف منونکې پراختیا کې تخصص لري او د دولتي سکتور، مدني ټولنې او پوهنتونونو استازي هم په کې شتون لري.
د MVI مشورتي پلاوی به خپله لومړۍ غونډه په ۲۰۲۶ کال کې جوړه کړي او په ۲۰۲۸ کال کې به د شاخص د لومړۍ درې کلنې بیاکتنې لپاره چمتوالی پیل کړي.
عادله راز لومړنۍ ښځه وه، چې له ۱۳۹۷ څخه تر ۱۴۰۰ لمریز کال پورې یې په ملګرو ملتونو کې د افغانستان د دایمي استازې په توګه دنده تر سره کړه. هغې د ۲۰۲۱ کال د جولای څخه د ۲۰۲۲ کال تر فبرورۍ پورې په متحده ایالاتو کې د افغانستان د اسلامي جمهوریت د وروستۍ سفیرې په توګه هم دنده تر سره کړې ده.
