طالبانو روانه اوونۍ په کابل، فاریاب، پکتیا، لغمان، کاپیسا او بلخ ولایتونو کې د دریو ښځو په ګډون ۷۵ تنه د بېلا بېلو تورونو له امله د خلکو په وړاندې په دورو وهلي دي.
رخشانه: دغه کسان، د نشه کوونکو ګولیو او الکولي مشروباتو، د پېر، پلور، قاچاق، تولید او څښلو، نامشروع اړیکې، لواطت، غلا او له واده بهر جنسي اړیکې په تورونو په دغه شپږو ولایتونو کې د خلکو په وړاندې په دورو وهلي.
یکشنبې د (سلواغې ۱۳ مه) د کابل په چهار آسیاب ولسوالۍ کې یو تن د خلکو په وړاندې ۳۹ دورې وهل شوی او په یوه کال بند هم محکوم شوی دی.
د طالبانو سترې محکمې د دې کس د تور په اړه څه نه دي لیکلي.
دوشنبې د (سلواغې ۱۴ مه) په کابل او فاریاب کې ۴۰ تنه د نشه کوونکو ګولیو او الکولي مشروباتو، د پېر، پلور، قاچاق، تولید او څښلو په تورونو په دورو وهلي دي.
۳۷ تنه د نشه کوونکو ګولیو او الکولي مشروباتو، د پېر او پلورپه تور په کابل کې له ۱۰ تر ۳۹ دورې وهل شوي دي.
دغه کسان د محکمې د پرېکړې له مخې، له اوو میاشتو تر دریو کلونو پورې په تنفذي بند هم محکوم شوي دي.
درې تنه د شرابو د تولید، پلورلو او څښلو په تور د فاریاب په شرین تګاب ولسوالۍ کې د خلکو په وړاندې ۳۹ دورې وهل شوي او په دوه کاله بند هم محکوم شوي دي.
سه شنبې د (سلواغې ۱۴ مه) د یوې ښځې په ګډون ۳۱ تنه د نامشروع اړیکې، غلا، لواطت او نشه کوونکو ګولیو او الکولي مشروباتو د پېر او پلور په تورونو په پکتیا، لغمان او کابل کې په دورو وهل شوي دي.
د یوې ښځې په ګډون دوه تنه د نامشروع اړیکې په تور د پکتیا ولایت په سیدکرم ولسوالۍ کې د خلکو په وړاندې ۲۵ دورې وهل شوي او په یوه کال او شپږ میاشتې بند محکوم شوي دي.
اووه تنه د غلا او لواطت په تور په لغمان کې ۳۹ دورې وهل شوي او په یوه او دوه کلونو په بند محکوم شوي دي.
۲۲ تنه د نشه کوونکو ګولیو او الکولي مشروباتو د پېر، پلور او قاچاق په تور په کابل ښار کې له ۱۰ تر ۳۹ دورو وهل شوي دي.
دغه کسان په کابل ښار کې د طالبانو د نشه يي توکو او الکولي مشروباتو د مخنیوي ابتدايه محکمې له خوا له اوو میاشتو تر دریو کلونو په تنفذي بند محکوم شوي دي.
چهارشنبې د (سلواغې ۱۵ مه) د یوې ښځې په ګډون دوه تنه له واده بهر جنسي اړیکې په تور د کاپیسا په آله سای ولسوالۍ کې د خلکو په وړاندې ۳۹ دورې وهل شوي دي.
معلومه نه ده، چې دې کسانو ته څومره موده بند سزا ورکړل شوې ده.
نن پنشنبې د (سلواغې ۱۶ مه) یوه ښځه د نامشروع اړیکې په تور د بلخ ولایت په زارې ولسوالۍ کې د خلکو په وړاندې ۳۵ دورې و وهل شوه.
معلومه نه ده، چې دا ښځه په څومره موده بند محکومه شوې ده.
