په افغانستان کې د ملګرو ملتونو د سیاسي استازولۍ دفتر (یوناما) د افغانستان د بشري حقونو د وضعیت په اړه تازه راپور کې ویلي، طالبانو یوه کم عمره ۱۸ کلنه نجلۍ له اجباري واده د انکار له امله نیولې او زنداني کړې ده.
رخشانه: په دې راپور کې چې نن (یکشنبې د سلواغې ۱۹ مه) خپور شوی او موده یې د ۲۰۲۵ له اکتوبر تر ډسمبر ده، راغلي، دغه ځوانه نجلۍ د طالبانو په یوه ولایتي زندان کې بندي ده.
یوناما دا نه ده معلومه کړې، چې دغه ځوانه نجلۍ څه وخت، له کوم یوه ولایت نه نیول شوې او په کوم ولایت کې زنداني ده.
د یوناما په راپور کې راوړل شوي، د دې راپور په موده کې، د جنسیت پر بنسټ ولاړ ډېری د تاوتریخوالي پېښې، له هغې جملې اجباري ودونه یې ثبت کړي دي.
په دې راپور کې لیکل شوي، د ۲۰۲۵ کال په می او سپټمبر میاشتو کې د طالبانو د امربالمعروف ځواکونو هرات کې ښځې د چادر نماز اغوستو ته اړ کړې او هغه ښځې چې له دې امره یې سرغړونه کړې وه د یوې لنډې مودې لپاره نیولې وې.
د راپور له مخې، د طالبانو د امربالمعروف ځواکونو د ۲۰۲۵ کال د نوامبر میاشتې په لومړیو کې، د هرات په عمومي ځایونو کې ښځې چادرۍ اغوستو ته اړ کړې. هغه ښځو چې چادرۍ یې نه درلودې، روغتون، روغتیايي مرکزونو، دولتي ادارو او د ودونو تالارونو ته له لاسرسي محرومې کړې.
یوناما زیاته کړې، چې طالبانو د ۲۰۲۵ کال د اکتوبر په درېیمه هرات کې د ښځو د تګ راتګ پر خپلواکۍ د محدودیتونو په لګولو سره، د هرات ښار په ۶۴ متره سړک کې د ښځو لپاره ځانګړي شوي جمعه بازار ته یوه ډله ننوتونکې ښځې په هوايي ډزو خورې کړې او د هغوی مخنیوی یې وکړ.
دې بنسټ ویلي، د طالبانو د امربالمعروف ځواکونو د ۲۰۲۵ کال د اکتوبر په ۶ مه، زابل کې د ښځو یوه ډله چې د سهار د سپورت لپاره له کوره وتلې وې، ودرولې او هغوی ته یې ویلي، چې نور په دې موخه له کوره را بهر نه شي.
د راپور له مخې، د طالبانو د امربالمعروف ځواکونو د ۲۰۲۵ کال د ډسمبر په ۸ مه، د اروزګان ولایت مرکز ترینکوټ کې په ښکاره ټکسي او کاسټر موټر چلوونکو ته امر وکړ، چې له محروم پرته ښځې موتر ته د پورته کېدو اجازه نه لري.
یوناما لیکلي، د طالبانو د امربالمعروف ځواکونو د ۲۰۲۵ کال د ډسمبر په ۲۷ مه، کندهار ښار کې له هټۍ والو غوښتي، چې هغه ښځې چې محرم نه لري، جامې پرې ونه پلوري.
دې بنسټ په خپل راپور کې لیکلي، د طالبانو د امربالمعروف ځواکونو کندهار او اروزګان کې په دوامداره توګه له روغتیايي مرکزونو څارنه کړې تر څو له محرم پرته ښځې او ښځینه کارکوونکې دې مرکزونو ته داخلې نه شي.
یوناما ویلي، د طالبانو دا اقدام د دې لامل شوی، تر څو بې محرمه ښځې روغتیايي خدماتو ته له لاسرسي بې برخې شي او له محرم پرته کارکوونکې هم ونه شي کولی خپل کار ځای ته ولاړې شي.
