په افغانستان کې د ملګرو ملتونو سیاسي استازولي (یوناما) د افغانستان د بشري حقونو د وضعیت په اړه په خپل تازه راپور کې ویلي، طالبانو د ۲۰۲۵ میلادي کال د اکتوبر له اولې د ډسمبر تر ۳۱ مې پورې لږ تر لږه ۲۸۷ تنه (۲۵۳ نارینه، ۳۰ ښځې، درې هلکان او یوه نجلۍ) د خلکو په وړاندې په دورو وهلي دي.
رخشانه: په دې راپور کې چې نن یکشنبې د (سلواغې ۱۹ مه) خپور شوی او موده یې د ۲۰۲۵ کال له اکتوبر نه تر ډسمبر پورې ده راغلي، طالبانو په دې موده کې په بادغیس او خوست کې دوه نارینه په عام محضر کې اعدام کړي دي.
یوناما په خپل راپور کې لیکلي، طالبانو د ۲۰۲۵ د اکتوبر په ۱۶ مه یو نارینه د بادغیس مرکز قلعه نور ښار کې د خلکو په وړاندې اعدام کړی. د راپور پر بنسټ د واک ته د طالبانو له بیا رسېدو وروسته ۱۲ تنه په عام محضر کې اعدام شوي دي.
د یوناما راپور وايي، طالبانو د ۲۰۲۵ د اکتوبر له اولې د ډسمبر تر ۳۱ مې پورې ۲۸۷ تنه (۲۵۳ نارینه، ۳۰ ښځې، درې هلکان او یوه نجلۍ) د خلکو په وړاندې په دورو وهلي دي.
دغه راز په راپور کې ویل شوي، د ۲۰۲۵ د اکتوبر له اولې د ډسمبر تر ۳۱ مې، د طالبانو له لوري د خپل سرو نیونو او بندي کولو ۲۸ پېښې او د مخکني دولت له چارواکو او امنیتي ځواکونو د غړو د ربړونې او بد چلند لږ تر لږه ۷ پېښې ثبت کړې دي.
په دې موده کې د طالبانو له لوري د پخواني نظام د امنیتي ځواکونو د ۱۴ غړو د وژنو د پېښو راپور ورکړل شوی. د قرباني شویو کسانو په منځ کې د مخکني دولت چارواکي، امنیتي سرتېري شتون لري، چې تازه له ایران او پاکستان څخه افغانستان ته راستانه شوي دي.
یوناما په خپل راپور کې راوړي، د طالبانو د استخباراتو ریاست د ۲۰۲۵ د اکتوبر په ۱۷ مه کابل ښار کې د شمشاد تلوېزیون د رسنیز فعالیت، چې تلوېزیون، راډیو او ټولنیزې شبکې د تړولو امر صادر کړ.
دې بنسټ د طالبانو له لوري په رسنیو د ساه کښو انخور خپرولو باندې بندیز ته په اشارې لیکلي، د دې محدودیت پلي کېدل، د هېواد په ګوټ کوټ کې په بېلا بېل شدت سره عملي کېږي.
یوناما ویلي، د طالبانو له لوري د هغه کسانو، چې پر خواله رسنیو د ناسمې محتوا په خپرولو تورن دي نیولو ته دوام ورکړی. د طالبانو د امربالمعروف ځواکونو د ډسمبر په ۱۱ مه هرات کې یوه ډله ځوانان له دې کبله، چې د یوه برېتانوي سریال څخه په تقلید یې جامې اغوستې وې نیولي دي.
راپور کې د طالبانو له لوري د ۲۰۲۵ د سپټمبر له ۲۹ مې د اکتوبر تر اولې په ټول هېواد کې د انټرنېټ بندولو ته په اشارې ویلي، طالبانو له دې اقدام وروسته، ټولنیزې شبکې فسبوک، ټیک ټاک او انسټاګرام فلټر کړي دي.
یوناما زیاته کړې، د دې راپور د چمتو کېدو په وخت کې، د طالبانو د امربالمعروف وزارت له نورو ټولو وزارتونو سره یو ځای، په هېواد کې د امربالمعروف قانون پلي کولو ته دوام ورکړی او د هغو تمرکز پر داسې مواردو لکه، د نارینه وو ږیره، د ښځو حجاب، د محرم اړتیا، د موسقۍ او ژوندیو موجوداتو مخنیوی او پر جومات د لمانځ کولو الزام باندې دی.
دې بنسټ ویلي، د ۲۰۲۵ د اکتوبر له اولې د ډسمبر تر ۳۱ مې پورې یې د طالبانو د امربالمعروف د ځریو له خوا ۵۲۰ ځلې خپل سرې نیونې او بندي کول او له ښځو او نارینه وو سره د ناوړه چلند پېښې ثبت کړې، چې تر ډېره، د ږیرې لنډولو، په لوېدیځ سټایل وېښتان، د موسقۍ خپرول یا اورېدل او د حجاب د مقرراتو څخه سرغړونو پورې اړوند دي.
