په افغانستان کې د ملګرو ملتونو د خوړو نړیوال پروګرام (WFP) اعلان کړی، چې په دغه هېواد کې ۳.۷ میلیونه ماشومان او ۱.۲ میلیونه ښځې له سختې خوارځواکۍ رنځېږي.
رخشانه: دې بنسټ نن (سه شنبې د سلواغې ۲۱ مه) په خپله اېکس پاڼه د یوه پوسټ په خپرولو سره لیکلي، خوارځواکي ورځ تر بلې زیاتېږي.
د خوړو نړیوال پروګرام لیکلي، د خوارځواکۍ زیاتوالی، کابل کې د دوی تر ملاتړ لاندې یوه کلېنیک ته هره ورځ په خوارځواکۍ اخته ماشوم ورکشوي.
دې بنسټ زیاته کړې، د اړتیاو په زیاتېدو سره به د ژغورونکو خوړو ملاتړ ته دوام ورکړي او له میندو او ماشومانو سره مرسته کوي، تر څو خپل د اړتیا وړ بېړنۍ درملنې ته لاسرسی پیدا کړي.
په افغانستان کې د خوړو نړیوال پروګرام (WFP) څه موده وړاندې په یوه راپور کې لیکلي وو، چې په افغانستان کې د خوړو د خوندیتوب وضعیت بحراني دی او شاوخوا ۱۷ میلیونه وګړي له سخت لوږې سره مخ دي او کابو ۴ میلیونه ماشومان د خوارځواکۍ له خطر سره مخ دي.
دې بنسټ وړاندیز کړی، چې د ماشومانو خوارځواکي به هم زیاته شي او راتلونکی کال به کابو څلور میلیونه ماشومان تر اغېز لاندې راولي.
یوناما هم څه موده وړاندې په یوه راپور کې ویلي وو، په افغانستان کې د خوړو نه خوندیتوب همداسې سخت دی او په ښخو او ماشومانو کې خوارځواکي ۱۵ سلنه زیاته شوې ده.
یوناما په افغانستان بشري وضعیت «خورا بحراني» بللی ویلي یې وو، د مرستو رسولو لپاره د بودجې کمښت، د زرګونو کسانو په ځانګړې توګه د ښځو او ماشومانو ژوند ګواښي.
