طالبانو د روانې اوونۍ په اوږدو کې په پروان، ارزوګان، زابل، لغمان، کاپیسا او کابل کې، د ۱۳ ښځو په ګډون ۳۵ تنه د بېلا بېلو جرمونو په تور په عام محضر کې په دورو وهلي دي.
رخشانه: دغه کسان د غلا، پلار ته د سپکاوي او کنځاوو، نامشروع اړیکو، له واده بهر جنسي اړیکې، لواطت له کوره تېښتې او تښتولو په تورونو په دغه ولایتونو کې په دورو وهلي دي.
شنبې د (سلواغې ۱۸ مه) د دریو ښځو په ګډون ۹ تنه د نامشروع اړیکې، سپکاوي او کنځاوو په تور په پروان او اروزګان ولایتونو کې په دورو وهل شوي دي.
د دریو ښځو په ګډون اته تنه د نامشروع اړیکې په تور د پروان بګرام ولسوالۍ کې د خلکو په وړاندې ۳۹ دورې وهل شوي او له یوه تر څلورو کلونو پورې په تنفذي بند محکوم شوي دي.
یو تن پلار ته د سپکاوي او کنځاوو په تور د اروزګان ولایت مرکز کې ۳۰ دورې وهل شوی او په پنځه میاشتې تنفذي بند محکوم شوی دی.
یکشنبې د (سلواغې ۱۹ مه) یو تن د غلا په تور د زابل ولایت شاه جوی ولسوالۍ کې د خلکو په وړاندې ۲۰ دورې وهل شوی او په دوه کاله تنفذي بند محکوم شوی دی.
دورشنبې د (سلواغې ۲۰ مه) د دوو ښځو ه ګډون اووه تنه له کوره د تېښتې او تښتولو او غلا په تورونو په لغمان او کاپیسا کې د خلکو په وړاندې په دورو وهل شوي دي.
د دوو ښځو په ګډون څلور تنه له کوره د تېښتې او تښتولو په تور د لغمان ولایت الینګار ولسوالۍ کې د خلکو په وړاندې له ۲۰ تر ۳۹ دورو وهل شوي او له شپږو تر ننه میاشتو تنفذي بند هم محکوم شوي دي.
درې تنه د غلا په تور د کاپیسا ولایت کوهبند ولسوالۍ کې د خلکو په وړاندې ۳۵ دورې وهل شوي او په دوه کاله تنفذي بند هم محکوم شوي دي.
سه شنبې د (سلواغې ۲۱ مه، درې تنه د غلا او نامشروع اړیکې په تورونو په لغمان او زابل ولایتونو کې د خلکو په وړاندې په دورو وهل شوي دي.
دوه تنه د غلا په تور د لغمان الیشنګ ولسوالۍ کې د خلکو په وړاندې ۳۹ دورې و وهل شول او په یوه کال تنفذي بند هم محکوم شول.
یو تن د نامشروع اړیکې په تور د زابل ولایت شاه جوی ولسوالۍ کې د خلکو په وړاندې ۳۰ دورې وهل شوی او په یوه کاله تنفذي بند هم محکوم شوی دی.
چهارشنبې د (سلواغې ۲۲ مه) د اتو ښځو په ګډون ۱۴ تنه له واده بهر جنسي اړیکې، نامشروع اړیکې او دلالۍ په تورونو کابل ښار کې له ۲۵ تر ۳۵ دورو وهل شوي او له پنځو میاشتو تر یو کال پورې په تنفذي بند محکوم شوي دي.
پنشنبې د (سلواغې ۲۳ مه) یو تن د لواطت په تور د لغمان ولایت قرغه يي ولسوالۍ کې د خلکو په وړاندې ۲۵ دورې و وهل شو او په درې کاله تنفذي بند هم محکوم شو.
