ننګرهار کې سیمه ییز چارواکي وايي، د دې ولایت بټي کوټ ولسوالۍ کې د راکټ د یوې پخوانۍ مرمۍ د چاودنې له امله، دوو ماشومانو ژوند بایللی او پنځه نور ټپیان شوي دي.
رخشانه: ننګرهار کې د طالبانو د امنیه قوماندانۍ ویاند سید طیب حماد ویلي، دغه پېښه نن ماسپښین مهال (پنشنبې د سلواغې ۲۳ مه) د بټي کوټ ولسوالۍ د «سپین خوړ څلورم فارم» په سیمه کې رامنځ ته شوې ده.
د حماد په وینا، دغه پېښه هغه مهال رامنځ ته شوې، چې ماشومانو د راکټ مرمۍ له موندلو وروسته د اور منځ ته اچولې او چاودنه یې کړې ده.
هغه زیاته کړې، د دې چاودنې په ترڅ کې دوو ماشومانو ژوند بایللی او پنځه نور ماشومان ټپیان شوي دي.
حماد د دغې پېښې د وژل شویو او ټپي ماشومانو د عمر، هویت او جنسیت په اړه جزیات نه دي ورکړي.
د دې پېښې ټپيان د سیمې د اوسېدونکو په همکارۍ او طالب ځواکونو له خوا د درملنې لپاره د ننګرهار حوزوي روغتون ته لېږدول شوي. د دوو ماشومانو روغتیايي وضعیت نازک ښودل شوی دی.
د ملګرو ملتونو د استازولۍ دفتر د راپور له مخې، په افغانستان کې د ماینونو او ناچاودو توکو د چاودنو ۸۰ سلنه قربانیان ماشومان دي.
یوناما اعلان کړی، چې افغانستان د ناچاودو توکو د قربانیانو له پلوه په نړۍ کې درېیم تر ټولو د لوړې مرګ ژوبلې هېواد ګڼل کېږي.
