سمنګان کې د طالبانو امنیتي چارواکي وايي، په دغه ولایت کې یوه ځوانه نجلۍ د کورنیو ستونزو له امله وژل شوې ده.
رخشانه: سمنګان کې د طالبانو امنیه قوماندانۍ د یوې خبرپاڼې په خپرولو سره ویلي، دې نجلۍ ۲۰ کاله عمر درلود او تېره شپه (پنشنبې د سلواغې ۲۳ مه) په خپل کور کې وژل شوې ده.
په خبرپاڼه کې د نجلۍ هویت ته اشاره نه ده شوې.
د خبرپاڼې له مخې، دغه ځوانه نجلۍ د خپل ورور له خوا د «ګیلاس» د ښیښې په ګزار او خفه کولو سره، د دې ولایت د مرکز ایبک ښار اړونده سیمه کې ژوند بایللی دی.
په خبرپاڼه کې راغلي، طالب ځواکونو د دې نجلۍ ورور د ولایت په مرکز ایبک ښار کې نیولی دی.
خبرپاڼه وايي، د نجلۍ ورور په خپل جرم اعتراف کړی او دوسیه یې عدلي او قضايي ارګانونو ته سپارل شوې ده.
طالبانو دا نه ده مشخصه کړې، چې دا سړی څو کلن وو او ولې یې خپله خور وژلې ده.
