ملګري ملتونه وايي، په هرو دریو ثانیو کې د نړۍ په یوه ګوټ کې یوه تر ۱۸ کلونو ټیټه نجلۍ د اجباري واده قرباني کېږي.
رخشانه: دغه بنسټ نن (شنبې د سلواغې ۲۵ مه) په خپله اېکس پاڼه د یوې خبرپاڼې په خپرولو سره ویلي، د ماشومانو ودونه د بشري حقونو سرغړاوی دی او دا کار له نجونو خپلې بشپړې وړتیا ته د رسېدو فرصت له هغوی اخلي.
ملګرو ملتونو نن د فبرورۍ ۱۴ مه د مینانو د نړیوالۍ ورځې په مناسبت د جنسیت پر بنسټ ولاړ تاوتریخوالي پر وړاندې د همغږۍ غوښتنه کړې ده.
د ملګرو ملتونو د وګړو صندوق (UNFPA) هم تر ۱۸ کلونو د ټیټ عمره ماشومانو ودونه له بشري حقونو سرغړونه بللې او لیکلي یې دي، په نړۍ کې له هرو پنځو نجونو یوه هغه یې ۱۸ کلنۍ ته تر رسېدو وړاندې په رسمي ډول ودېږي یا په غیر رسمي اړیکه ورکړل شوې دي.
ملګرو ملتونو اټکل کړی، چې ټوله نړۍ کې شاوخوا ۶۴۰ میلیونه نجونې او ښځې، په ماشوم توب [۱۸ کلنۍ ته تر رسېدو وړاندې] واده شوې او هر کال ۱۲ میلیونه ځوانې نجونې ۱۸ کلنۍ ته تر رسېدو وړاندې واده کوي.
دې بنسټ لیکلي، د ماشومانو ودونه د نجونو ژوند او روغتیا ګواښي او د هغوی راتلونکې محدودوي. هغه نجونې چې تر وخت وړاندې ودونونو ته اړویستل کېږي، تر ډېره په ځوانۍ کې امیندواره کېږي، چې دا کال د امیندوارۍ یا د زېږون خطرونه زیاتوي.
د ملګرو ملتونو د وګړو صندوق زیاته کړې، هغه نجونو چې له ۱۸ کلنۍ وړاندې ودونه کړي، تر ډېره د خپل ژوند د شریک له خوا د فزیکي اوجنسي تاوتریخوالي سره مخ شوې دي.
دې بنسټ د کم عمره او ماشومانه ودونو ته د پای ټکي اېښودلو لپاره د یو لړ سیاستونو، پروګرامونو او قوانینو د جوړلو غوښتنه کړې ده.
د طالبانو تر واک لاندې افغانستان کې هم د ماشومانه ودونو پدیده دود ده. په تېرو څه باندې څلورو کلونو کې داسې راپورونه خپاره شوي، چې د طالبانو لوړ پوړو غړو د مخکني حکومت د یو شمېر غړو لوڼې اجباري واده ته اړویستې دي.
