کونړ کې سیمه ییزې سرچینې وايي، د دې ولایت په مروره ولسوالۍ کې، په یوه دیني مدرسه کې یو ماشوم د خپل ټولګیوال له خوا وژل شوی دی.
رخشانه: کونړ کې دوه سیمه ییزو سرچینو د هویت پټ ساتلو سره رخشانې رسنۍ ته ویلي، دغه پېښه نن سهار (شنبې د سلواغې ۲۵ مه) د مرورې ولسوالۍ د «اعلاخېل» سیمې، په یوه دیني مدرسه کې رامنځ ته شوې ده.
د سرچینو په وینا، وژل شوی ماشوم اته کلن دی او په قتل تورن ماشوم لس کلن دی.
سرچینو زیاته کړې، وژل شوی ماشوم د کونړ ولایت د مرورې ولسوالۍ او بل ماشوم د شیګل ولسوالۍ اوسېدونکی دی. دې ماشومانو په یوه دیني مدرسه کې زده کړې کولې.
د دې ماشوم د وژل کېدو انګېزه نه ده معلومه، خو د چاقو په ګذارونو وژل شوی دی.
د سرچینو د خبرو له مخې، دا قضیه د قومي مخورو او دیني عالمانو په منځګړیتوب حل شوې ده.
کونړ کې ځايي طالب چارواکو تر اوسه په دې اړه څه نه دي ویلي
