په افغانستان کې د ملګرو ملتونو د بشري مرستو د همغږۍ دفتر (اوچا) وايي، طالبانو د ښځو پر کار محدودیتونه سخت کړي او د رواني روغتیا خدماتو اړوند فعالیتونه یې ممنوع اعلان کړي.
رخشانه: دې بنسټ نن (یکشنبې د سلواغې ۲۶ مه) د یوه راپور په خپرولو سره اعلان کړی، افغانستان کې ښځې «په ټولنیز چاپېریال کې په رواني روغتیايي خدماتو او رواني ټولنیز ملاتړ خورا ډېرې تکیه کوي.»
د ملګرو ملتونو د بشري مرستو د همغږۍ دفتر په راپور کې راغلي، طالبانو اړینو روغتیايي خدماتو ته هم د ښځو لاسرسي باندې محدودیتونه لګولي دي.
د دې راپور پر اساس، روغتیايي ښځینه کارکوونکې د تلېفون د کارکولو حق نه لري او په ځینو سیمو کې ښځې اړ دي، چې روغتیايي مرکز ته د مراجعې پر مهال له ځان سره نارینه محرم ولري.
راپور زیاته کړې، د ښځینه کارکوونکو او د جنسیت حساسو پروګرامونو لپاره د لاسرسي محدودیتونه سخت شوي، ښځینه مرستندویه کارکوونکې د روغتیا او زده کړو پرته له ټولو سکتورونو منع شوې او د ښځو په مشرۍ فعالیتونه درول شوي دي.
اوچا ویلي، بشري مرستو ته د لاسرسي محدودیتونه د ۲۰۲۵ کال په دویمه نیمايي کې زیات شوي. د دې کال د جولای او ډسمبر میاشتو کې بشري همکارانو د لاسرسي ۶۲۳ پېښې راپور کړې، چې د کال د لومړۍ نیمايي په پرتله ۲۵ سلنه زیاتوالی ښيي.
دې پېښو د ۳۴۹ بشري فعالیتونو د لنډمهاله ځندولو او د اتو تاسیساتو، په عمده توګه د روغتیايي مرکزونو او د ښځو د زده کړې مرکزونو د تړل کېدو لامل شوي، چې د تېر راپور ورکولو مودې په پرتله ۳۷ سلنه زیاتوالی ښيي.
د اوچا په راپور کې راغلي، چې طالبانو مداخله کړې، په دې کې د ښځینه کارکونکو بندیز، د تړونونو ځنډول، د کاروونکو په ټاکلو کې مداخله، په ګمارنو او تدارکاتو کې مداخله او د کارکوونکو او حساسو معلوماتو په اړه د معلوماتو غوښتنه کول شامل دي.
اوچا زیاته کړې، د مرستندویه بنسټونو د ۳۴ کارکوونکو (۱۸ نارینه او ۱۶ ښځینه) نیول د تېر راپور ورکولو په موده کې د ۱۰۰ کارکوونکو د نویولو په پرتله ۶۶ سلنه کمښت ښيي، خو بیا هم روان امنیتي ګواښونه منعکسوي.
د ملګرو ملتونو یو له شریکانو راپور ورکړی، چې د هېواد په یوه سیمه کې د دوی ښځینه کارکوونکې د نامعلومه وسله والو کسانو له خوا څارل شوې، چې د دوی خوندیتوب یې له ګواښ سره مخ کړی او د دوی په فعالیت یې منفي اغېز کړی دی.
