ننګرهار کې سیمه ییزې سرچینې وايي، د دې ولایت مرکز جلال آباد ښار کې د یوه خصوصي ښوونځي د دوو زده کوونکو جسدونه موندل شوي دي.
رخشانه: جلال آباد ښار کې دوه ځايي سرچینو ویلي، د دې دوو زده کوونکو جسدونه سه شنبې د (سلواغې ۲۸ مه) د جلال آباد ښار شپږمه ناحیه کې د یوه خصوصي ښوونځي د نننه موندل شوي دي.
دا پېښه د «الایمان» په نوم خصوصي ښوونځي کې رامنځ ته شوې ده.
د دې ښوونځي یوه ښوونکي د هویت پټ ساتلو سره ویلي، دغه پېښه هغه مهال رامنځ ته شوې، چې په دې ښوونځي کې د څلورنیمې میاشتنۍ ازموینې د ممتازو زده کوونکو د ستاینې مراسم روان وو.
د هغه په وینا، دې زده کوونکو د جامو د بدلولو لپاره د ښوونځي یوې کوټې ته چې جنراتور په کې روښانه وو، ورغلې او دروازه یې په ځان پسې بنده کړې ده، او وروسته یې چې هرڅومره ور ډبولی، غږ یې چا نه دی اورېدلی.
سرچینې زیاته کړې، دغه نجونې په زیات احتمال د جنراتور څخه خواره شوي ګاز یې ژوند اخیستی دی.
دې ښوونکي ویلي، چې د مراسمو له پای ته رسېدو وروسته، د دې زده کوونکو د پلټنې پر مهال هغوی، په بېهوښه حالت کې موندل شوې، چې روغتون ته د لېږدولو پر مهال یې ژوند له لاسه ورکړی دی.
سرچینه وايي، دغه زده کوونکې یوه ۱۱ کلنه هدیه او بله ۱۲ کلنه عجوه دي.
په ورته وخت ننګرهار کې د طالبانو د امنیه قوماندانۍ ویاند سید طیب حماد د دې پېښې د پخلي تر څنګ ویلي، د پېښې په تړاو د دې خصوصي ښوونځي مدیر نیول شوی دی.
تر اوسه د پېښې کره جزیات نه دي په ډاګه شوي او د دې ماشومانو کورنیو هم تر اوسه خبریالانو ته جزیات نه دي ورکړي.
