ننګرهار کې سیمه ییزې سرچینې وايي، د دې ولایت بهسود ولسوالۍ کې د پاکستان په هوايي برید کې د ښځو او ماشومانو په ګډون د یوې کورنۍ ۲۳ غړو ته مرګ ژوبله اوښتې ده.
رخشانه: د ننګرهار بهسود ولسوالۍ کې دوه ځايي سرچینو د هویت پت ساتلو سره رخشانې رسنۍ ته ویلي، دغه پېښه د (کب ۲ مه) د شپې ۱۲ بجې د یادې ولسوالۍ د «ګردي کڅ» په سیمه کې رامنځ ته شوې ده.
د سرچینې په وینا، دغه هوايي بریدونه د استوګنې په کورونو شوي، چې په ترڅ کې یې د ښځو او ماشومانو په ګډون د یوې کورنۍ ۱۶ غړي وژل شوي او ۷ نور ټپیان شوي دي.
دغه برید د شهاب الدین په نوم د یوه بېوزله او کرونده ګر په کور شوی، چې کور یې په بشپړه توګه ویجاړ شوی او اوس د جسدونو د راایستلو لپاره هڅې روانې دي.
ننګرهار کې د طالبانو د روغتیا ریاست ویاند نقیب الله رحیمي وايي، تر اوس د پېښې له ځایه ۷ ټپیان د ننګرهار حوزوي روغتون ته لېږدول شوي، چې روغتیايي حالت یې ښه دی.
ننګرهار کې د طالبانو د اطلاعاتو او فرهنګ ریاست امر قریشي بدلون نن سهار ویلي، پر بهسود ولسوالۍ د پاکستاني پوځ په هوايي برید کې د ۱۱ ماشومانو په ګډون ۱۷ تنه وژل شوي او پنځه نور ټپیان شوي دي.
په دې پېښه کې د وژل شویو ماشومانو هویت او جنسیت نه دی مشخص شوی او د ټپیانو د روغتیايي حالت په اړه هم جزیات نه دي ورکړل شوي.
نن سهار رسنیو راپور ورکړ، چې د پاکستان د پوځ جیټ الوتکو نیمه شپه د پکتیکا ولایت د برمل ولسوالۍ په مرغه سیمه کې په یوه دیني مدرسه برید کړی دی.
په ورته وخت د پاکستان دولت ویلي، پر افغان خاوره یې بریدونو په خپل هېواد کې د تېرو ځانمرګو بریدونو په ځواب کې کړي دي.
د دغه هېواد د اطلاعاتو او نشراتو وزارت په یوه بیان کې ولي، قطعي شواهد په لاس کې لرو، چې ښيي دغه بریدونه د خوارجو له خوا د طالبانو د مشرانو په لارښوونه او په افغانستان کې د هغوی د مېشتو مخ ته وړونکو په مټ تر سره شوي.»
پاکستان ویلي، «د استخباراتي معلوماتو پر اساس د پاکستان طالبانو سره تړلو ترهګرو او خوارجو داعش پورې اړوند ډلو په اوو پټنځایونو یې د پاکستان او افغانستان پر پوله دقیق برید تر سره کړی دی.»
د طالبانو دفاع وزارت په ننګرهار او پکتیکا د پاکستان د هوايي بریدونو پخلی کړی ویلي یې دي، چې په دغه بریدونو کې یوه دیني مدرسه او یو شمېر د استوګنې کورونه په نښه شوي دي.
دغه وزارت ویلي، د دې بریدونو په ترڅ کې د ښځو او ماشومانو په ګډون لسګونه کسانو ته مرګ ژوبله اوښتې ده.
