بادغیس کې سیمه ییز طالب چارواکي وايي، د هرات – بادغیس په لویه لار د یوه مسافر وړونکي بس موټر د چپه کېدو له امله، د ښځو او ماشومانو په ګډون ۳۵ تنو ته مرګ ژوبله اوښتې ده.
رخشانه: بادغیس کې د طالبانو د امنیه قوماندانۍ ویاند صدیق الله صدیقي وايي، دغه پېښه نن (یکشنبې د کب ۳ مه) غرمه مهال ۱۱ بجې د قلعه نو ښار د شپږمې حوزې اړوند د سبزک په سیمه کې رامنځ ته شوې ده.
د صدیقي په وینا، یو مسافروړونکی ۳۰۳ ډوله موټر له هرات نه د بادغیس مرکز قلعه نو ښار په لور روان وو، چې د موټر چلوونکي د بې احیتاطۍ له امله له سړکه اوښتی دی.
نوموړي زیاته کړې، په دې پېښه کې ۹ تنو ژوند له لاسه ورکړی او ۳۵ تنه نور ټپیان شوي، چې ښځې او ماشومان هم په کې شامل دي.
د طالبانو د امنیه قوماندانۍ ویاند وايي، د پېښې ټپیان د سیمې د خلکو او طالب ځواکونو په مرسته د درملنې په موخه روغتون ته لېږدول شوي دي.
د ځینو ټپیانو روغتیايي حالت نازک ښودل شوی دی.
ترافیکي پېښې هر کال په افغانستان کې د ښځو او ماشومانو په ګډون د سلګونه کسانو ژوند اخلي. ډېری دغه ډول پېښې د موټر چلوونکو د بې پروایۍ او ترافیکي قانون نه مراعتولو، لارو د خرابوالي او موترو د زړښت له امله رامنځ ته کېږي.
