په افغانستان کې د ملګرو ملتونو د سیاسي استازولۍ دفتر (یوناما) وايي، پر ننګرهار د پاکستان په هوايي بریدونو کې د ښځو او ماشومانو په ګډون لږ تر لږه ۱۳ ملکي وګړي وژل شوي او اووه تنه نور ټپیان شوي دي.
رخشانه: یوناما نن (دوشنبې د کب ۴ مه) د یوې اعلامیې په خپرولو سره اعلان کړی، چې دغه بریدونه د شنبې په شپه ۱۲ بجې د ننګرهار ولایت په بهسود او خوګیاڼو ولسوالۍ کې شوي دي.
په اعلامیه کې راغلي، پاکستان د پکتیکا ولایت په برمل ولسوالۍ کې په یوه دیني مدرسه او په ارګون ولسوالۍ کې د «ملکي وګړو» په یوه کور هم برید کړی دی.
یوناما ویلي، په دغه بریدونو کې د ملګي وګړو د مرګ ژوبلې معلومات په لاس کې نشته.
د ملګرو ملتونو د سیاسي استازولۍ دفتر له ټولو ښکېلو اړخونو غوښتي، چې تاوتریخوالي او دښمنیو ته د تل لپاره پای ټکی کېږي، تر څو له غیرنظامیانو ساتنه وشي.
تېره ورځ ننګرهار کې سیمه ییزه سرچینو رخشانې رسنۍ ته ویلي وو، چې د پاکستان په هوايي بریدونو کې د دغه ولایت په بهسود ولسوالۍ کې د ښځو او ماشومانو په ګډون د یوې کورنۍ ۲۳ تنو ته مرګ ژوبله اوښتې ده.
دغه بریدونه د بهسود ولسوالۍ د «ګردي کڅ» په سیمه کې د استوګنې په یوه کور شي، چې په ترڅ کې یې د ښځو او ماشومانو په ګډون د دې کورنۍ ۱۶ غړي وژل شوي او ۷ نور ټپیان شوي دي.
د پاکستان دولت ویلي وو، دغه بریدونه یې په خپل هېواد کې د وروستیو ځانمرګو بریدونو په غبرګون کې کړي دي.
طالبانو هم په پکتیکا او ننګرهار کې د پاکستان هوايي بریدونه تایید او اعلان یې کړی وو، چې د دې بریدونو په ترڅ کې یوه دیني مدرسه او یو د استوګنې کور په نښه شوي دي.
