د ملګرو ملتونو عمومي منشي آنتونیو ګوترش وايي، د نړۍ په ګوټ ګوټ کې بشري حقونه تر بشپړ برید لاندې دي.
رخشانه: ګوترش نن (دوشنبې د کب ۴ مه) د ملګرو ملتونو د بشري حقونو د ۶۱ غونډې سره هممهاله ویلي، نړۍ کې بشري حقونو د هغه کسانو له خوا تر برید لاندې دي، چې ډېر ځواک لري.
هغه زیاته کړې، دغه پېښه (د بشري حقونو سرغړاوی) په نړۍ کې په ښکاره توګه او تر ډېره د هغه کسانو له خوا رامنځ ته کېږي، چې ډېرځواک لري.
نوموړي ټینګار کړي، په سختو شرایطو کې له بشري حقونو دفاع یوه بنسټیزه دنده ګنل کېږي.
هغه همدارنګه ویلي «بشري حقونه د ښځې ورځې لپاره شعار نه دي، بلکې یوه تل پاتې ژمنه ده، او باید په سختو او د لګښت وړ شرایطو کې ترې دفاع او ساتنه وشي.»
ګوترش د بشري حقونو څخه سرغړاوی د نړۍ لپاره ویجاړونکی وباله او وايي، کله چې بشري حقونه تر پښو لاندې کېږي، هر څه: سوله، پراختیا ټولنیز انسجام، باور او پیوستون، تر پښو لاندې کېږي:
نوموړي ویلي: «موږ په داسې نړۍ کې ژوند کوو، چې هلته کړاو توجیه کېږي، انسانان د چنې وهلو په توکو بدلېږي او بشري حقونه په پام کې نه نیول کېږي، جګړې مخ په زیاتېدو دي او له سزاو خوندیتوب په یوه ساري ناروغۍ بدل شوی دی.»
د ملګرو ملتونو سرمنشي زیاته کړې، بشري حقونو ته د بې احترامۍ بحران نورې نړیوال وېشنونه منعکس او لا پسې پراخ کړي دي، لکه د بشري اړتیاوو زیاتوالی، د بودیجې کمېدل او د نابرابرۍ پراخېدل.
ګوترش دغه ستونزو ته په اشارې چې په دې منځ کې تر ټولو زیانمن کسان څنډې ته کېږي او د بشري حقونو مدافعان له لومړنیو کسانو دي، چې غلي کېږي.
هغه ویلي، د بشري حقونو په سرغړاوی سره، په نړۍ کې مدني چاپېریال محدودېږي، خبریالان او مدني فعالان زنداني کېږي، غیردولتي بنسټونه تعطیل کېږي، د ښځو حقونه شاه ته غورځول کېږي، د ماشومانو حقونه په پام کې نه نیول کېږي، معلولیت لرونکي کسان څنډې ته کېږي او دیموکراسي ورستېږي.
ګوترش د لوري د بدلون وکړه او ویې ویل: «د قانون حاکمیت د ژمنې په نوي کولو او د نړیوالې جنايي محکمې په ملاتړ سره، اجازه مه ورکوی، چې د بشري حقونو تخریب د سیاسي مصلحت یا جیوپولېټیک سیالۍ منل شوې بیه شي.»
