د ملګرو ملتونو د سرمنشي مرستیال آمنه محمد وايي، نړۍ کې ۱۳۸ میلیونه ماشومان لا هم د کار له آمله، د خپل ماشومتوبه بې برخې دي.
رخشانه: محمد نن (چهارشنبې د کب ۶ مه) په خپله اېکس پاڼه د یوې ويډیو په خپرولو سره، نړۍ کې د ماشومانو د کار پای ته رسولو غوښتنه وکړه.
هغې ويلي: «د دې ستونزې پای ته رسول ته اړتیا ده، چې بېوزلي، نابرابري او د سم کار کمښت له رېښې وباسو او داسې ټولنې جوړې کړو، چې په هغې کې هر ماشوم وکولی شي زده کړه او وده وکړي او وغوړېږي.»
د ملګرو ملتونو د سرمشني مرستیالې همدارنګه ویلي، د ماشومانو کار ختمول په هدفي مداخلو امکان نه لري، بلکې باید د پراخو پراختیايي ستراتېژیو په چوکاټ کې ځای کړل شي.
هغې زیاته کړې، دا کړنلارې کولی شي، دغه پدیدې له ریښې حل کړي او داسې شرایط رامنځ ته کړي، چې کورنۍ یې د ناممکن انتخابونو کولو ته اړ نه شي.
آمنه محمد ټینګار کړی، چې په کیفیت لرونکو زده کړو او د مهارتونو پراختیا باندې پانګونه، واقعي فرصتونو ته د لاسرسي لار برابروي.
د ملګرو ملتونو د سرمنشي مرستیالې غوښتنه کړې، چې د «ماشومانو کار باید په هر ځای کې غیرقانوني شي» او ویلي یې دي، هغه کسان چې له ماشومانو ناوړه ګټه پورته کوي، باید مسوول وګڼل شي.
د نړیوالو بنسټونو د راپورونو پر اساس، د طالبانو په بیا واک ته رسېدو سره د کارګرو ماشومانو شمېر زیاتوالی کړی دی.
افغان ماشومان په ډېرو سختو او خطرناکو شرایطو کې کار کوي، خو د کارګرو افغان ماشومانو کره شمېره په لاس کې نشته.
