له پاکستان سره د طالبانو تر نښتو وروسته د افغانستان د وحدت ګوند مشر محمد محقق له غبرګون نیونې وروسته، د طالبانو مشر د راه فردا تلوېزیون د نشراتو بندولو او د محقق د ملکیتونو او مالونو د مصادره کولو امر ورکړی دی.
رخشانه: یوې خبر لرونکې سرچینې د هویت پټ ساتلو سره رخشانې رسنۍ ته و ویل، دغه امر پرون (شنبې د کب ۹ مه) د طالبانو د استخباراتو له لوري عملي شوی دی.
د سرچینې په وینا، د راه فراد تلوېزیون د فعالیت بندول او د دغه تلوېزیون د ودانۍ او د کابل په لوېدیځ کې د دوه نورو ودانیو په ګډون د محمد محقق د ټول ملکیت او مالونو د مصادرې حکم په «مستقیم» ډول د طالبانو د مشر له خوا صادر شوی دی.
سرچینې زیاته کړې، چې د شنبې په شپه د راه فردا تلوېزیون کارکوونکي د دې رسنۍ له ودانۍ ایستل شوي، رسنۍ مهر و لاک او ساختمان یې مصادره شو.
د افغانستان د خلکو د وحدت ګوند مشر محمد محقق دوه ورځې وړاندې له پاکستان سره د طالبانو نښتو ته په غبرګون کې پر پاکستان د طالبانو بریدونه «تېري کوونکي او ترهګر پالوونکي» وبلل.
هغه په خپله فسبوک پاڼه لیکلي: «دا لومړی ځل نه دی، چې طالبان په تېري کوونکو او ترهګر پالونکو سیاسیتونو سره د سیمې امنیت ګډوډوي او زموږ ګران هېوادوال په یوه ناغوښتل شوي جګړه کې ښکېلوي او په خاورو وینو کې یې لتاړوي.»
محقق پر دام لیکلي «ښه ګاونډیتوب» له ګاونډیو هېوادونو سره هغه مهال کېدای شي، چې طالبان «په خاوره کې د ننه د سیمې د ترهګرو کړیو تمویل او روزنه» ودروي.
طالبانو هم ویلي، چې د «راه فردا» تلوېزیون د فعالیت بندول او د محمد محقق د ملکیت او مالونو د مصادرې امر یې د پاکستان سره د دې ډلې د جګړې په اړه د محقق د دریځ نیونې او «پر افغان ملکي وګړو باندې د پاکستان د هوايي بریدونو روا ګڼلو» په غبرګون کې صادر کړی دی.
د طالبانو د اطلاعاتو او کلتور وزارت ویاند خبیب غفران په خپله اېکس پاڼه لیکلي «محقق د بې بنسټه څرګندونو او د دښمن د تحریکولو هڅه کوي، په افغانستان کې ملي یووالي ګواښ او د عمومي افکارو په غوښتنه» دا اقدام لازم او مناسب بلل شوی دی.
تر اوسه محقق د راه فردا تلوېزیون د فعالیت بندېدو او د ملکیت د مصادرې په اړه یې تر اوسه څه نه دي ویلي.
راه فردا تلوېزیون د روان کال په غوايي میاشت کې د دغه رسنۍ د کارکوونکو د شکایت او د هغوی د تنخواو د نه ورکړې له آمله ځنډول شوی وو.
دغه تلوېزیون د فعالیت تر دوه میاشتې درېدو وروسته د روان کال د چنګاښ میاشتې په ۳ مه خپلې خپرونې بیا پیل کړې وې.
د راه فردا تلوېزیون د افغانستان د خلکو د وحدت ګوند د مشر محمد محقق په امتیاز په کابل ۱۳۸۵ کې په کابل کې جوړ او په رسمي توګه پیل شو.
د افغانستان د خبریالانو مرکز او د افغان رسنیو د ملاتړ بنسټ په جلا جلا اعلامیو کې د طالبانو له لوري د راه فردا تلوېزیون بندول او د محقق د مالونو مصادره کول محکوم کړي دي.
دې دواړو بنسټونو د طالبانو دا اقدام د بیان د خپلواکۍ او د هېواد د رسنیو د آزادۍ د بنسټیزو اصولو خلاف بللی او د هغه د خلاصېدو غوښتنه یې کړې ده.
