فراه کې د طالبانو امنیه قوماندانۍ وايي، د دې ولایت مرکز کې یو سړي خپل مور او ورور په ډزو وژلي او د کورنۍ دوه نور غړي یې ټپیان کړي دي.
رخشانه: دغه پېښه تېره ورځ (دوشنبې د کب ۱۱ مه) د فراه مرکز ښار په «ریګي» سیمه کې رامنځ ته شوې ده.
فراه کې د طالبانو امنیه قوماندانۍ په خبرپاڼه کې ویلي، یوه سړي د خپلې کورنۍ په څلورو غړو له هغې جملې په مور او خور ډزې کړې دي.
خبرپاڼه کې راوړل شوي، د دې پېښې په ترڅ کې د دې سړي مور او ورور وژل شوي، خور او یو بل ورور یې ټپیان شوي دي.
د خبرپاڼې له مخې، د پېښې ټپيان د درملنې په موخه روغتون ته لېږدول شوي دي.
د دې پېښې د ټپیانو د هویت، عمر، روغتیايي وضعیت په اړه جزیات په لاس کې نشته.
دا پېښه د یوې کورنۍ شخړې له امله رامنځ ته شوې ده.
طالبانو ویلي، د پېښې په تړاو یې یو تن نیولی دی.
