افغانستان کې د ملګرو ملتونو سیاسي استازولۍ (یوناما) اعلان کړی، چې د طالبانو او پاکستان ترمنځ په وروستیو نښتو کې ۴۲ ملکي وګړي وژل شوي او د ښځو او ماشومانو په ګډون ۱۰۴ تنه نور ټپیان شوي دي.
رخشانه: دغه بنسټ نن (سه شنبې د کب ۱۲ مه) په یوه اعلامیه کې لیکلي، دغه شمېر ملکي وکړي «د مخامخ ډزو له امله» په پکتیا، ننګرهار، کونړ او خوست کې وژل شوي او ټپیان دي.
اعلامیه کې راغلي: « فبروزۍ د ۲۶ مې د شپې له وروستیو د ۲۰۲۶ د مارچ تر ۲مې یوناما د ملکي وګړو د مرګ ژوبلې لږ تر لږه ۱۴۶ پېښې ثبت کړې. په دې شمېر کې ۴۲ وژل شوي او د ښځو او ماشومانو په ګډون ۱۰۴ نور ټپیان شوي دي. دغه شمېر لومړني شمېرې وړاندې کوي.»
د ملګرو ملتونو سیاسي استازولی د طالبانو او پاکستان تر منځ جګړې د ملکي وګړو د تلفاتو په زیاتوالي او د هغو د بشري پایلو په اړه خبرداری ورکړی دی.
یوناما ویلي، دا جګړې به په افغانستان کې بد بشري وضعیت لا پسې خراب کړي.
یوناما د طالبانو او پاکستان تر منځ د جګړې د درېدو غوښتنه کړې او د غیرنظامیانو د مرګ ژوبلې زیاتېدو او بشري پایلو په اړه یې خبرداری ورکړی .
د ملګرو ملتونو سیاسي استازولی د جګړې له ښکېلو غاړو غوښتي، چې نړیوالو قوانینو ته په خپلو ژمنو او بشردوستانه نړیوالو قوانینونو ته ژمن پاتې شي او د جګړې پر مهال د ملکي وګړو ژوند خوندي کړي.
دې بنسټ په افغانستان کې د ملګرو ملتونو د بشري مرستو د همغږۍ دفتر (اوچا) له قوله لیکلي، چې د جګړې له امله د پکتیا، پکتیکا، ننګرهار، کونړ او خوست څخه شاوخوا ۱۶ زره او څلور سوه کورنۍ بې ځایه شوې دي.
همدارنګه یوناما ویلي، د طالبانو او پاکستان تر منځ جګړې په سرحدي سیمو کې اړمنونو کسانو ته د خدماتو وړاندې کول هم تر اغېز لاندې راوستي.
د طالبانو او پاکستان تر منځ جګړ له یوې اوونۍ راهیسې پیل شوې او تر اوسه دوام لري.
