کاناډا کې د پیل سیمې پولیسو اعلان کړی، چې دوی د یوې افغان ښځې او د ملګرو ملتونو د یو پخواني دیپلومات د مېرمنې مژګان عیني د ورکېدو قضیه د قتل په توګه څېړي.
رخشانه: د پیل پولیسو دوشنبې (د کب ۱۱ مه) په یوه اعلامیه کې لیکلي، ۳۸ کلنه مژګان عیني چې د «سارا» یا «ساره» په نومونو هم پېژندل کېده، په میسیساګا کې کویین فردریکا درایو او داندس اسټریټ ایسټ کې ژوند کاوه.
اعلامیې راوړي، مېرمن عیني د ۲۰۲۲ کال په جون میاشت کې ورکه شوې وه او د هغې قضیه اوس د قتل په توګه څېړل کېږي او د دې پېښې په اړه یو شکمن کس پېژندل شوی دی.
د پیل پولیسو د مژګان عیني د قتل په تړاو د پېژندل شوي شکمن کس د هویت په اړه څه نه دي ویلي او معلومه نه ده، چې هغه د عیني خاوند دی که څنګه.
د پولیسو په وینا، په افغانستان کې د هغې د کورنۍ غړو وروسته له هغې، چې اوږد وخت یې اړیکه ورسره نه شوای نیولای، د تېر میلادي کال په جون میاشت کې یې د هغې د ورکېدو راپور ورکړی دی.
د پیل پولیسو ویلي، د پلټونو او د هغې د کورنۍ له غړونو، همکارانو او ملګرو سره د خبرو اترو پر بنسټ، د بانکي حسابونو، تلېفوني سوابقو، روغتیايي تاریخ بیا کتنې پر بنسټ، دوی د ۲۰۲۲ د جون راهیسې د هغې د ژوندي پاتې کېدو په اړه هېڅ شواهد نه دي موندلي.
د پولیسو په اعلامیه کې راغلي، له دې وړاندې هم د مژګان عیني د مېړه په وړاندې د امریکا په نیویارک کې د برید او هلو ټکولو ادعا شوې وه، خو د ديپلوماتیک خوندیتوب له امله هېڅ تور نه دی پرې ثبت شوی.
د یادونې ده، چې څه موده وړاندې یو شمېر رسنیو د یوې افغان ښځې او د ملګرو ملتونو د پخواني دیپلومات د مېرمنې مژګان عیني د خور له قوله د هغې د ورکېدو راپور ورکړی وو.
د مژګان عیني وژنه د افغان ښځو د وژنې په لړ کې وروستۍ ده، چې له هېواده بهر د هغوی د مېړونو یا د کورنۍ د غړو له خوا ترسره کېږي. ورته قضیې په استرالیا او کاناډا کې هم پېښې شوې دي.
