د افغانستان د بشري حقونو د چارو لپاره د ملګرو ملتونو ځانګړي راپور ورکوونکي ریچارد بنټ د مارچ اتمه د ښځو پیوستون نړیوالې ورځې په درشل کې ویلي، افغان ښځې او نجونې د نړۍ سمبولیک پیوستون نه غواړي، هغوی خپل حقونه غواړي.
رخشانه: بنټ نن (شنبې د کب ۱۶ مه) په یوه ویډیو کې ویلي، افغان ښځې او نجونې غواړي، د یوه انسان په توګه د ژوند حق ولري.
نوموړي د طالبانو تر کټرول لاندې افغانستان د ښځو او نجونو لپاره د عدالت، برابرۍ او ملاتړ غوښتنه وکړه.
بنټ ویلي، طالبانو په تېرو څه باندې کلونو کې پرجنسیتي تبعیض ولاړ نظام رامنځ ته کړی، هغه نظام چې د بنټ په وینا «چې د ښځو د حذف، بېلوالي او دوی د واکمنۍ» لپاره پلان شوی دي.
ده د افغان ښځو او نجونو د حقونو او اساسي خپلواکیو په اړه د طالبانو پراخو محدودیتونو ته په اشارې ویلي، هغوی لا هم تسلیم شوې نه دي او د خپلو حقونو تر لاسه کولو لپاره یې مبارزې ته دوام ورکړی دی.
نوموړي و ویل: «افغان ښځې او نجونې څه که په جلاوطنۍ کې دي او که د هېواد د ننه، تر ځمکې لاندې ښوونځي رهبري کوي، اعتراضي غورځنګونه اداره کوي، په سختو شرایطو کې روغتیايي خدمات وړاندې کوي، د بشري حقونو سرغړونې مستندوي او د خپلو حقونو او هېواد د راتلونکې لپاره مبارزه کوي.»
بنټ له نړیوالې ټولنې د افغانستان د خلکو د ملاتړ غوښتنه کړې وايي، د نړیوالو مرستو کمېدل به د افغان وګړو په ځانګړې توګه د ښځو او نجونو پر ژوند ویجاړونکی اغېز لري.
دغه راز نوموړي د ښځو تر مشرۍ لاندې بنسټونو چې د بنټ په اند د ځپلو سره سره لا هم خپلو مبارزو ته دوام ورکوي د ملاتړ غوښتنه کړې.
ځانګړي راپور ورکوونکي له زده کړو د نجونو محرومیت ته په اشارې له نړیوالې ټولنې غوښتي، چې له بدیلو لارو په دې برخه کې پانګونه وکړي. هغه و ویل: «نړۍ باید اجازه ورنه کړي، چې د نجونو یو بشپړ نسل له راتلونکې او فرصت څخه محرومې شي.»
هغه همدارنګه له طالبانو سره د نړیوالو په اصولي تعامل ټینګار وکړ وايي «له طالبانو سره تعامل خپلو حقونو ته د ښځو د لاسرسي او په افغانستان کې د بشري حقونو د وضعیت له ښه کېدو پرته نه باید عادي شي.»
د ملګرو ملتونو ځانګړي ارپور ورکوونکي په پای کې ټینګار کړی، چې سیاسي پروسې باید د افغان ښځو او نجونو حقونو په مرکز کې ځای پر ځای کړي او ښځې د هېواد د راتلونکې پوړې اړوند غونډو کې شاملې کړي.
