سره له دې چې له کوره د باندې د ښځې په غږ اورېدو بندیز لګول شوی، خو ننګرهار ولایت کې یوې مېرمنې پر افغانستان د پاکستان د بریدونو په غبرګون کې د یوې غوڼدې پر مهال د پاکستان ضد شعارونه ورکول.
رخشانه: طالبانو نن (شنبې د کب ۱۶ مه) د ننګرهار مرکز جلال آباد ښار کې په خپل ملاتړ او پر هېواد د پاکستان د وروستیو بریدونو په غبرګون کې د خلکو یوه لویه غونډه رابللې وه.
په دې اعتراضي راټولېدنه کې، چې د جلال آباد ښار په شېرزي ورزشي لوبغالي کې جوړه شوې وه، د یو شمېر ښاریانو، د ښوونځیو او دیني مدرسو د زده کوونکو په ګډون یوې ښځې هم ګډون درلود.
په یوه ویډیو کې چې د دې غونډې له جریان څخه د رخشانۍ رسنۍ لاس ته ورغلې، یوه چادرۍ اغوستې ښځه لیدل کېږي، چې د طالبانو په ملاتړ «مرګ پر پنجاب» شعار ورکوي.
دې ښځې پر داسې مهال په دې غونډه کې ګډون کړی او د طالبانو په ملاتړ او پاکستان ضد یې شعار ورکاوه، چې طالبانو له کوره د باندې د ښځي غږ اورېدل ممنوع او حرام بولي.
نن سهار اطلاعات روز ورځپاڼې هم په یوه راپور کې لیکلي، طالبانو په زور او د پیسو د ورکړې پر بنسټ په ننګرهار کې خلک دې ته هڅوي، چې د پاکستان پر ضد جوړېدونکې غونډه کې ګډون وکړي.
دغه ورځپاڼې لیکلي، طالبانو د ننګرهار ولایت د ولسوالیو په مرکزونو کې قومي مخورو ته امر کړی، چې هر یو له دوی به ۲۰ تنه له ځانه سره دې غونډې ته راولي.
طالبانو د پاکستان له لوري د هېواد پر ځینو برخو تر بریدونو وروسته د یو شمېر ولایتونو اوسېدونکي دې ته هڅولي، چې د دوی په ملاتړ او د پاکستان پر ضد اعتراضي غونډې جوړې او ګډون په کې وکړي.
دې ډلې په تېرو څه باندې څلورو کلونو کې د ښځو د زده کړې د محدودلو تر څنګ ښځې له کور بهر، په دولتي ادارو او نړیوالو سازمانونو له کاره په راګرځولو سره هغوی له خپلو اساسي حقونو محرومې کړې دي.
