د مارچ اتمه د ښځو د پیوستون نړیوالې ورځې سره سم، یو شمېر سیاسي څېرو دې ورځې ته په غبرګون کې له افغان ښځو او نجونو د ملاتړ ژمنه او پر زده کړه ټینګار کړی دی.
رخشانه: د افغانستان د چارو لپاره د برېتانیا ځانګړي استازي ریچارد لیندسي نن (یکشنبې د کب ۱۷ مه) په خپله اېکس پاڼه د یوه پوسټ په خپرولو سره ویلي، چې د افغان ښځو او نجونو تر څنګ ولاړ دی.
نوموړي لیکلي، د ښځو او نجونو حقونه د کورنیو، ټولنې او د افغانستان د راتلونکې لباره خورا ارزښت لري.
د برېتانیا استازي د ښځو او نجونو په وړاندې د تاوتریوالي پای ته رسولو ژمنه کړې وايي، د ښځو او نجونو حقونو ته د خپل هېواد په سیاست کې ځای ورکوي.
د هېواد پخواني ولسمشر حامد کرزي هم نن د مارچ د اتمې په مناسبت یو ځل بیا د ښځو او نجونو پر مخ د ښوونځیو او پوهنتونونو د پرانستلو غوښتنه کړې ده.
کرزي په خپله اېکس پاڼه لیکلي: «یو ځل بیا ټينګار کوم، چې تر هر څه ژر د ښوونځیو او پوهنتونو دروازې باید د نجونو او ښځو پر مخ پرانستل شي، کار او په ټولنه کې فعال حضور ته د هغوی زمینه برابره کړای شي، تر څو زموږ هېواد د خپلو اولادونو پر توان او تکیه پرمخنګ وکړي، هوساینې ته ورسېږي او د بهرنیو له اړتیا خلاصون ومومي.»
پخواني ولسمشر د هېواد په پرمختګ کې د ښځو رول ته اشاره کړې لیکلي یې دي «ښځو او نجونو په بېلا بېلو پړاونو کې د نارینه وو سره اوږه پر اوږه د افغانستان په وده او پرمختګ کې ښکاره رول او ارزښتمنده برخه درلوده.»
د ملګرو ملتونو د خوړو او کرنې سازمان (فائوا) هم په خپله اېکس پاڼه د یوه پوسټ په خپرولو سره د افغان ښځو او نجونو پر ملاتړ ټینګار کړی دی.
دې بنسټ لیکلي، کله چې ښځې هوسا شي، افغانستان هم ځواکمن کېږي.
