په ملګرو ملتونو کې د افغانستان د دایمي استازولۍ سرپرست نصیر احمد فایق وايي، د افغان ښځو او نجونو پر زده کړو د طالبانو محدودیتونه د دې لامل کېږي، چې یو بشپړ نسل د زده کړې له حق او فرصتونو محروم شي.
رخشانه: فایق دوشنبې شپه (د کب ۱۸ مه) د ملګرو ملتونو امنیت شورا په ناسته کې د افغانستان د وضعیت په اړه ویلي، طالبان د افغانستان پر خلکو د خپلې واکمنۍ د پنځم کال په درشل کې دي.
هغه و ویل: «نړیوالې ټولنې او دې شورا ته روښانه شوې، چې طالبانو په دې موده کې د بدلون، اعتدل یا د خلکو له واقعیتونو سره د تعامل په پار هېڅ ګام نه دی اخیستی. پرعکس د هغوی سیاستونه ورځ تر بلې سخت، انحصاري او ځپوونکي شوي دي.»
نوموړي زیاته کړې، د طالبانو تر واکمنۍ لاندې افغانستان له ټولنیز، بشردوستانه، اقتصادي او سیاسي ژور بحران لاندې دی. هغه بحران چې د هغه په وینا، د طالبانو پر ځپنې او ډار ولاړې واکمنۍ مستقیمه پایله ده.
فایق ویلي، د ښځو او نجونو له اساسي حقونو او خپلواکیو سیستماتیک محرومیت، د بنسټونو فاشل کېدا، د بشري حقونو پراخه سرغړونې، د پخوانیو امنیتي ځواکونو او غیرنظامي وګړو هدفي وژنې، د بېوزلۍ زیاتوالی او د ناهیلۍ پراختیا، افغانستان د لا ژورې انزوا او بحران لور ته کش کړی دی.
فایق د افغان ښځو او نجونو په وړاندې د طالبانو محدودیتونو ته اشاره کړې وايي، دغه محدودیتونه د دې سبب کېږي، چې یو بشپړ نسل د زده کړې له حق او فرصتونو محروم شي.
نوموړي «په افغانستان کې له یوه لوی بشري ناورین څخه د مخنیوي په پار د ملګرو ملتونو، نړیوالو همکارانو او مرستندویه هېوادونو» د رول ستاینه کړې ویلي یې دي، بشري مرستې تل پاتې حل لار نه ده.
هغه د طالبانو او پاکستان تر منځ جګړو ته هم اشاره کړې وايي، د راپورونو پر اساس د روان میلادي کال د مارچ تر ۷ مې نېټې پورې لږ تر لږه ۱۸۵ تنه مړه او ټپیان شوي، چې ۵۵ سلنه د هغو ښځې او ماشومان دي.
په ملګرو ملتونو کې د افغانستان د دایمي استازولۍ سرپرست د دواړو اړخونو تر منځ د جګړې د بندېدو غوښتنه کړې ویلي یې دي، پاکستان باید د افغانستان پر ملکي سیمو او حیاتي بنسټونو خپل بریدونه ودروي.
