طالبانو د روانې اوونۍ په اوږدو کې د هېواد په ۹ ولایتونو کې د اووه ښځو په ګډون ۵۰ تنه د بېلا بېلو تورونو له امله د خلکو په وړاندې په دورو وهلي دي.
رخشانه: دغه کسان، په اروزګان، نیمروز، بلخ، غور، کابل، زابل، بدخشان، تخار او بامیانو کې، د غلا، له کور او زندان نه تېښتې، له واده بهر جنسي اړیکې، اخلاقي فساد، نشه کوونکو ګولیو د پېر، پلور او قاچاق او د جوارګرۍ په تورونو په دورو وهلي دي.
شنبې د (کب ۱۶ مه) اروزګان، نیمروز او بلخ کې شپږ تنه د غلا، کور او زندان نه تېښتې او له واده بهر جنسي اړیکې په تورونو په دورو وهل شوي دي.
څلور تنه د غلا او له کور او زندان نه د تېښتې په تور د اروزګان دهراود ولسوالۍ کې د خلکو په وړاندې له ۲۰ تر ۳۹ دورو وهل شوي او له دوه تر شپږ میاشتو تنفذي بند هم محکوم شوي.
یو تن د غلا په تور د نیمروز ولایت مرکز زرنج ښار کې د خلکو په وړاندې ۳۰ دورې وهل شوی او په درې کاله تنفذي بند هم محکوم شوی دی.
یو تن له واده بهر جنسي اړیکې په تور د بلخ ولایت بلخ ولسوالۍ کې د خلکو په وړاندې ۳۵ دورې وهل شوی دی.
یکشنبې د (کب ۱۷ مه) غور او کابل ولایتونو کې د دریو ښځو په ګډون ۲۴ تنه د اخلاقي فساد، نشه کوونکو ګولیو د پلور او قاچاق په تورونو په دورو وهل شوي دي.
د درې ښځو په ګډون شپږ تنه د اخلاقي فساد په تور د غور مرکز ښار کې د خلکو په وړاندې ۳۹ دورې وهل شوي. معلومه نه ده، چې دې کسانو ته څومره موده بند اورول شوی دی.
۱۸ تنه بیا د نشه کوونکو ګولیو د پېر، پلور او قاچاق او چرسو په تور په کابل کې له ۱۰ تر ۳۹ دورو وهل شوي او په اووه تر درې کلونو تنفذي بند هم محکوم شوي دي.
چهارشنبې د کب (۲۰ مه) د دو ښځو په ګډون ۱۱ تنه، له کوره د تېښتې، الکولي مشروباتو د پلور او لېږد، نامشروع اړیکې او جوارګرۍ په تور په زابل، بدخشان او تخار ولایتونو کې د خلکو په وړاندې په دورو وهل شوي دي.
د یوې ښځې په ګډون دوه تنه له کوره د تېښتې په تور د زابل ولایت میزانه ولسوالۍ کې د خلکو په وړاندې ۳۹ دورې وهل شوي او په څلور او پنځه کاله تنفذي بند محکوم شوي دي.
درې تنه د الکولي مشروباتو د لېږد او پلور په تور د بدخشان اشکاشم ولسوالۍ کې د خلکو په وړاندې ۳۹ دورې وهل شوي او په دوه کاله تنفذي بند هم محکوم شوي دي.
د یوې ښځې په ګډون شپږ تنه د نامشروع اړیکې لرلو او جوازګرۍ په تور د تخار ولایت ینګي قلعه ولسوالۍ کې د خلکو په وړاندې ۲۵ دورې و وهل شول او له یوه تر پنځو کلونو په بند محکوم شول.
پنشنبې د (کب ۲۱ مه) د دوه ښځو په ګډون ۹ تنه د الکولي مشروباتو د پلور، له واده بهر جنسي اړیکې او غلا په تورونو په بلخ او بامیان ولایتونو کې وهل شوي دي.
د یوې ښځې په ګډون شپږ تنه د الکولي مشروباتو د پلور او له واده بهر جنسي اړیکې په تور د بلخ مرکز مزارشریف ښار کې د خلکو په وړاندې ۳۹ دورې وهل شوي. معلومه نه ده، چې دې کسانو ته څومره بند سزا اورول شوې ده.
دوه تنه د غلا په تور د بامیان مرکز بامیان ښار کې د خلکو په وړاندې ۳۵ دورې وهل شوي دي او په یوه کال تنفذي بند هم محکوم شوي دي.
یوه ښځه له واده بهر جنسي اړیکې په تور د بلخ ولایت بلخ ولسوالۍ کې د خلکو په وړاندې ۳۵ دورې وهل شوې. معلومه نه ده، چې دې ښځې ته څومره بند سزا اورول شوې ده.
سره له دې، چې د بشري حقونو سازمانونو او د بشري حقونو فعالانو په عام محضر کې خلکو ته بدني سزا د انساني اصولو خلاف عمل بللی او هغه یې غندلي دي، خو طالبانو په تېرو کابو پنځو کلونو واکمنۍ کې، د ښځو په ګډون سلګونه تنه په عام محضر کې په دورو وهلي او لږ تر لږه ۱۲ تنه یې په دې موده کې اعدام کړي دي.
