کندوز کې سیمه ییز طالب چارواکي وايي، د دې ولایت امام صاحب ولسوالۍ کې یوه قابله د ناپېژانده کسانو له خوا وژل شوې ده.
رخشانه: کندوز کې د طالبانو د امنیه قوماندانۍ ویاند جمعه الدین خاکسار ځايي رسنیو ته ویلي، دغه پېښه د پنشنبې په ورځ مازیګر مهال (د کب ۲۱مه) د امام صاحب ولسوالۍ د مرکز څلورمې امنیتي حوزې اړوند سیمه کې رامنځ ته شوې ده.
د نوموړي په وینا، پېښه هغه مهال رامنځ ته شوې، چې کله دا قابله له خپل کتنځي څخه د کور پر لور روانه وه.
خاکسار زیاته کړې، چې پر دې قابله د ناپېژانده کسانو له خوا د چاقو ګذارونه شوي او ژوند یې بایللی دی.
طالبانو ویلي، د دې پېښې د روښانه کولو لپاره څېړنې پیل شوې دي.
د دې قابلې ښځې د هویت او عمر په اړه څه نه دي ویل شوي او معلومه نه ده، چې په کوم دلیل وژل شوې ده.
ځینو رسنیو راپور ورکړی، چې دا قابله عدالت حمیدي نومېده او د تاجکستان د کولاب وکړې وه.
د راپورنو له مخې، دې قابلې کابو دوه کاله د کندوز د امام صاحب ولسوالۍ په ۵۰ بستریز روغتون کې په نسايي ولادي برخه کې کار کړی وو.
راپورنه دا هم وايي، چې دغه قابله د شنبې په ورځ د امام صاحب ولسوالۍ د رابط په سیمه کې په خپل کور کې د ناپېژنده کسانو له خوا وژ شوې او جسد یې پرون تاجکستان ته لېږدول شوی دی.
د تاجکستان دولت تر اوسه د دې قابلې د وژل کېدو په اړه څه نه دي ویلي.
