د ملګرو ملتونو کاري ډلې د ښځو او نجونو په وړاندې د تبعیض په اړه ویلي، په افغانستان کې د ښځو او نجونو سیستماتیکه ځپنه لا هم دوام لري.
رخشانه: دې بنسټ نن (دوشنبې د کب ۲۵ مه) په خپله اېکس پاڼه لیکلي، د ملګرو ملتونو د امنیت شورا د تېرې اوونۍ غونډه کې په دې اړه خبرې اترې شوې دي.
د ښځو او نجونو په وړاندې د تبعیض په اړه د ملګرو ملتونو کاري ډلې ویلي، د امنیت شورا په ناسته کې له ثانوي او لوړو زده کړو او د ممنوعیت د لغوه کولو او له عمومي ژوند څخه د ښځو په نه حذفولو ټيڼګار وشو.
دې بنسټ د طالبانو د محکمو جزايي اصول نامې توشېح ته په اشارې ویلي، دا سند تبعیض بنسټیز کوي.
د ښځو او نجونو د تبعیض په اړه د ملګرو ملتونو کاري ډلې، د افغان ښځو او نجونو د وضعیت د حل لپاره د بېړني نړیوال اقدام غوښتنه کړې ده.
د ملګرو ملتونو امنیت شورا د تېرې اوونۍ د دوشنبې په شپه، د افغانستان د وضعیت په اړه یوه ناسته تر سره کړه. د دې ناستې ګډونوالو پر افغان ښځو او نجونو د طالبانو محدودیتونه روښانه او د هغو پر لغوه کېدو یې ټيڼګار وکړ.
په افغانستان کې د ملګرو ملتونو ملتونو د سیاسي استازولۍ (یوناما) سرپرستې جورجټ ګانیون، په دې ناسته کې ویلي وو، پر ښځو او نجونو د طالبانو محدودیتونه «نه یواز د ښځو او نجونو، بلکې د ټولو خلکو لپاره» زیان راوړونکي دي.
په ملګرو ملتونو کې د افغانستان د استازولۍ سرپرست نصیراحمد فایق، په دې ناسته کې ویلی وو، طالبان پر افغان وګړو د خپلې واکمنۍ د پنځم کال د تحمیلولو په درشل کې دي.
نوموړي ویلي وو، طالبانو په دې موده کې د بدلون، عدالت یا د افغانانو د واقعیتونو سره د تعامل لپاره کوم مانا لرونکی ګام نه دی پورته کړی. پرعکس د دوی سیاستونه او پالیسۍ ورځ تر بلې ځپوونکې، سختې او انحصاري شوې دي.
فایق د طالبانو تر ولکې لاندې افغانستان هغه هېواد وباله، چې لا هم د ژور ټولنیز، بشري، اقتصادي او سیاسي کړکېچ سره مخ دی. هغه بحران چې د هغه په وینا، د طالبانو د واکمنۍ نېغه پایله ده، چې پر ځپنې او ډار ولاړه ده.
