د طالبانو د محکمو جزايي اصول نامې ته د غبرګونونو پر دوام، د بښنې نړیوال سازمان وايي، د دې سند په توشېح کېدو سره د افغان ښځو ځپنه د زیاتېدو په حال کې ده.
رخشانه: دې بنسټ نن (دوشنبې د کب ۲۵ مه) په خپله اېکس پاڼه د یوې اعلامیې په خپرولو سره لیکلي، له کلونو راهیسې د ښځو او نجونو حقونه د طالبانو له خوا تر پښو لاندې شوي دي.
د بښنې نړیوال سازمان لیکلي، د طالبانو د جزايي محکمو اصول نامه، عدالت، برابرۍ او خپلواکۍ ته د افغان ښځو او نجونو لاسرسی لا محدودوي.
دې بنسټ زیاته کړې «طالبان باید همدا اوس دا سخت قانون لغوه کړي»
د روان میلادي کال په پنځمه د طالبانو د محکمو جزايي اصول نامه دې ډلې د مشر ملا هبت االله اخوندزاده په لاسلیک په غیر رسمي ډول توشیح او خپره شوه. د دې سند منځپاڼګې د بشري حقونو بنسونو او نړیوالې ټولنې تر منځ پراخې اندېښنې راپارولې دي.
د بشري حقونو فعالان او بنسټونه د طالبانو دا قانون د نړیوالو اصولو او کړنلارو خلاف بللې وايي، طالبان د دې قانون په توشیح سره غواړي، خپلو جرمونو ته مشروعیت ورکولو په لټه کې دي.
د طالبانو په د محکمو په جزايي اصول نامه کې غلامي په رسمیت پېژندل شوې او د ډېری جرمونو لپاره د اعدام سزا په پام کې نیول شوې ده.
