افغانستان کې د ملګرو ملتونو سیاسي استازولۍ (یوناما) ویلي، کابل ښار کې د په نشه د روږدو د درملنې په مرکز «امید» باندې د پاکستان په هوايي بریدونو کې لسګونه کسانو ته مرګ ژوبله اوښتې ده.
رخشانه: یوناما نن (سه شنبې د کب ۲۶ مه) په یوه اعلامیه کې ویلي، کابل کې یوه پېښه رامنځ ته شوې، خو مشخصه کړې یې نه ده، چې په دې مرکز د پاکستان په برید کې څومره کسان وژل شوي او ټپیان دي.
طالبانو نن سهار اعلان وکړ، چې د روږدو د درملنې په مرکز د پاکستان په هوايي برید کې شاوخوا ۴۰۰ تنه وژل شوي او ۲۵۰ ټپیان دي.
طالبان وايي، د ژغورنې عملیات دوام لري او دا شمېرې هم وروستۍ نه دي.
یوناما پر روغتونونو او ملکي تاسیساتو برید ممنوع بللی وايي، په جګړیزه شرایطو کې «ناروغو کسانو او ټپیانو، روغتیايي کارکوونکو، روغتونونو او آمبولانسونو ته باید درناوی وشي.»
د ملګرو ملتونو سیاسي استازولۍ زیاته کړې، د طالبانو او پاکستان تر منځ جګړه کې ملکي وګړي بیه پرې کوي.
د یوناما په وینا، د فبرورۍ د ۲۶ مې د مارچ تر ۱۶ مې مخکې یې افغانستان کې د لږ تر لږ ۷۶ ملکي وګړو د وژل کېدو او د ۲۱۳ تنو ټپي کېدل مستند کړي دي.
دې بنسټ یو ځل بیا د تاوتریخوالي د کمېدو او اوربند غوښتونکی شوی او له ښکېلو اړخونو یې غوښتي، چې د ملکي وګړو خوندیتوب ته پاملرنه وکړي.
د روغتیا نړیوال سازمان هم پر افغان خاوره د پاکستان وروستیو بریدونو ته په غبرګون کې وايي، لږ تر لږه ۶ روغتیايي مرکزونه تر اغېز لاندې راغلي دي.
د روغتیا نړیوال سازمان عمومي منشي تدروس ادهانوم قبریسوس په خپله اېکس پاڼه د یوه پوسټ په خپرولو سره لیکلي، د روغتیا نړیوال سازمان د دې پېښو د تایید او څېړنې په حال کې دی.
هغه زیاته کړې، د جګړو زیاتوالي پر روغتیايي نظام فشارونه وارد کړي او د زیان مننونکو ټولنو د روغتیا او هوساینې لپاره ګواښونه زیاتوي.
د روغتیا نړیوال سازمان له ښکېلو اړخونو غوښتي، چې کړکېچ راکم کړي او سوله او خوندیتوب ته لومړیتوب ورکړي.
