ایمرجنسي روغتون اعلان کړی، چې کابل ښار کې د روږدو د درملنې په مرکز د پاکستان د هوايي برید په ترڅ کې د یوې ښخې په ګډون ۲۷ ټپیان دغه روغتون ته وروړل شوي دي.
رخشانه: ایمرجنسي روغتون نن ماښام (سه شنبې د کب ۲۶ مه) په یوه اعلامیه کې لیکلي، دا ۲۷ تنه ټپیان کابل کې د دې روغتون د جګړې قربانیانو د جراحۍ مرکز ته لېږدول شوي دي.
د دې روغتون په اعلامیه کې راغلي: «په ټیانو کې چې ټول غټان دي، یوه ښځه هم شته. د دو تنو روغتیايي وضعیت کړکېچن دی. درې تنو روغتون ته د رسېدو پر مهال ژوند له لاسه ورکړی وو.»
افغانستان کې د ایمرجسنی د پروګرامونو مدیر دیان پانیک ویلي دي: «موږ په خپل روغتون کې ۲۷ تنه منلي او اړتیا شوه، چې د ډله ییزو تلفاتو پروتوکولونه مو فعال کړو.»
هغه زیاته کړې، چې د روغتیايي تاسیساتو باید تل درناوی وشي.
پانیک پر دوام ټینګار کړی چې «په وروستیو میاشتو کې وضعیت لا خراب شوی، په ځانګړې توګه پلازمېنه کابل کې، هغه ځای چې په ۲۰۲۱ کال کې د جګړو د پای ته رسېدو له وخته داسې بریدونه نه وو لیدل شوي.»
هغه ویلي، وروستي پېښه څو اوونۍ وړاندې رامنځ ته شوه، چې له هغې وروسته، څو تنه ټپیان، له هغې جملې ښځې او ماشومان دې روغتون ته راوړل شول.»
طالبانو اعلان کړی، چې کابل ښار کې د روږدو د درملنې په مرکز د پاکستان په هوايي برید کې لږ تر لږه ۴۰۰ کسان وژل شوي او ۲۵۰ نور ټپیان شوي دي.
دې ډلې ویلي، په دې مرکز کې شاوخوا دوه زره تنه تر درملنې لاندې وو.
کابل کې سرچینې وايي، طالبان خپلواکو رسنیو ته د دې پېښې د پوښلو اجازه نه ورکوي او له نورو رسنیو یې هم غوښتي، چې د نظامي مرګ ژوبلې په اړه راپور ورنه کړي.
