د طالبانو مرستیال ویاند حمدالله فطرت ادعا کړې، چې د کابل د څرخي پله په سیمه کې د معتادینونو د درملنې «امید» مرکز د پاکستان په هوايي بریدونو کې لږ تر لږه ۴۰۰ تنه وژل شوي او ۲۵۰ نور ټپیان شوي دي.
رخشانه: پاکستان پر افغان خاوره د خپلو بریدونو پر دوام، د دوشنبې (کب ۲۵ مې) په شپه شاوخوا ۹ بجې یو ځل بیا د کابل ښار ځینې برخې او ننګرهار بمبار کړ.
د طالبانو ویاند وايي، د مرګ ژوبلې د زیاتېدو اټګل کېدای شي.
طالبان وايي، د کابل څرخي پله په سیمه کې د امید په نوم د نشه يانو د درملنې مرکز کې شاوخوا ۲ زره نشه یان تر درملنې لاندې وو.
رخشانه رسنۍ په رسمي ډول هغه شمېرې چې د طالبانو له خوا خپرې شوې نه شي تاییدولی. تر اوسه پورې روغتونو هم په خپلواکه توګه د مرګ ژوبلې شمېرې نه دي تایید کړې. کابل کې د ملګرو ملتونو سیاسي استازولۍ (یوناما) هم تر اوسه په دې اړه غبرګون نه دی ښودلی.
کابل کې یو خبریال د هویت پټ ساتلو سره رخشانې رسنۍ ته ویلي، طالبانو یوازې څو مشخصو رسنیو ته د دې پېښې د خبري پوښښ اجازه ورکړې او نور خبریالان او رسنۍ د پېښې ځای ته نه پرېږدي.
په هغه ویډیوګانو کې، چې پر دغه مرکز د پاکستان له هوايي بریدونو وروسته په خواله رسنیو خپرې شوې، لیدل کېږي، چې پراخه اورلګېدنه رامنځ ته شوې او لمبې او لوګي آسمان ته پورته کېږي.
طالبانو همدارنګه ویلي، پاکستان په ننګرهار ولایت کې هم پر ځینو سیمو بریدونه کړي دي. دې ډلې نه ده معلومه کړې، چې دا بریدونه مرګ ژوبله لري که نه.
د پاکستان د اطلاعاتو او نشراتو وزارت پر کابل او ننګرهار د دوشنبې شپې د بریدونو ویډیو خپره کړې ده. په خپره شوې ویډیو کې ښودل کېږي، چې پاکستان په کابل کې دوه سیمې تر برید لاندې نیولې دي.
پاکستان ویلي، چې په کابل او ننګرهار کې یې د پاکستاني طالبانو (ټي ټي پي) اړوند مهمات او نظامي مرکزونه په نښه کړي دي.
دې بریدونو د سیاسي څېرو او بشري حقونو د بنسټونو تر منځ پراخ غبرګونونه راپورته کړي دي. د افغانستان د بشري حقونو لپاره د ملګروملتونو ځانګړي راپور ورکوونکي ریچارد بنټ د پاکستان او افغانستان تر منځ د تاوتریخوالي کمولو غوښتنه کړې ده.
هغه په خپله اېکس پاڼه لیکلي: «له دواړو لورو غواړو، چې تاوتریخوالی راکم کړي، زغم وکړي او نړیوالو قوانینو ته، له هغې جملې د ملکي وګړو او غیر نظامي ځایونو، لکه روغتونونو له په نښه کولو ډډه او درناوی ورته وکړي.»
د بشري حقونو د څار ډلې د آسیايي برخې څېړونکې فرشته عباسي هم دې برید ته په غبرګون کې ویلي، چې غیر نظامي بنسټونه باید په هېڅ صورت په نښه نه شي، او «طالبان باید فورآ دا پېښه وڅېړي.»
پخواني ولسمشر حامد کرزي او د مخکني حکومت اجرائیه رییس عبدالله عبدالله هم پر افغان خاوره د پاکستان بریدونه غندلي او ویلي یې دي، دا بریدونه د نړیوالو اصولو خلاف دي.
