د افغانستان د خبریالانو مرکز (AFJC) اعلان کړی، چې د طالبانو تر واک لاندې افغانستان کې د رسنیو له آزادۍ سرغړونې، تېر یوه کال کې ۲۰ سلنه زیاتې شوې دي.
رخشانه: دې مرکز نن (چهارشنبې د کب ۲۷ مه) د خبریالانو ملي ورځې سره سم په یوه راپور کې، په ۱۴۰۴ کال کې د افغانستان د رسنیو د آزادۍ وضعیت ارزولی دی.
د خبریالانو د مرکز په راپور کې راغلي، طالبانو په تېر یوه کال کې پر رسنیو کنټرول زیات کړی او په هېواد کې د رسنیو ځپل او سانسور په بېمخینې توګه زیاتوالی موندلی دی.
د دې راپور پر اساس، په ۱۴۰۴ کال کې لږ تر لږه ۲۰۷ ځلې د رسنیو له آزادۍ سرغړونې او د خبریالانو په وړاندې تاوتریخوالی ثبت شوی، چې په کې د دوه خبریالانو وژل کېدل، د یوه خبریال ټپي کېدل، ۱۸۳ ځلې ګواښل، ۲۱ ځلې د خبریالانو او رسنیزو فعالانو نیول شامل دي.
د خبریالانو مرکز ویلي، په ۱۴۰۳ لمریز کال کې د رسنیو څخه د سرغړونو ۱۷۲ پېښې، له هغې جملې ۱۲۲ ځلې ګواښل او ۵۰ ځلې د خبریالانو نیول په هېواد کې ثبت شوي دي.
په دې راپور کې راغلي، په ۱۴۰۴ لمریز کال کې د ساه کښوو انځور خپرولو بندیز د دې لامل شوی، چې لږ تر لږه ۲۱ سیمه ییز تلوېزیونونه د دې ممنوعیت په دلیل ودرېږي او یا په راډیو بدل شي.
دې مرکز زیاته کړې، په تېر یوه کال کې، اته رسنۍ او خبري بنسټونه، د طالبانو د رسنیز سیاست د نه پلي کولو په تور اړ شوې، چې فعالیت ودروي او لږ تر لږه د ۱۰ رسنیزو بنسټونو جوازونه هم لغوه شوي دي.
د خبریالانو د مرکز په راپور کې راغلي، په تېر یوه کال کې، په رسنیو د طالبانو فشار د سانسور او ځپلو لامل شوی دی.
دې مرکز ویلي، د بندي خبریالانو څخه د جبري اعترافونو خپرول، په خبري ناستو کې د ښځینه خبریالانو د ګډون مخنوی او د دوی غږونه سانسورول د وېرې او ځپلو پالیسۍ د ترویج او د سخت جنستي توپیر بېلګې دي، چې په هېواد کې یې مخنیه نه ده لیدل شوې.
د خبریالانو مرکز وايي، طالبانو د رسمي او غیر رسمي جوړښتونو څخه په ګټې اخیستنې سره، دولتي او اړونده رسنۍ په تبلیغاتي او د پروپاګنډا په توکو بدلې کړې دي.
دې مرکز ویلي، د خپلواکو رسنیو په ځپلو او اطلاعاتو ته په لاسرسي د سختو محدودیتونو په لګولو سره، د «یو غږیزه» سیاست د پلي کولو او د خپلواکو رسنیو او خبریالانو د یو اړخیزه روایتونو او بدنامولو د ترویج په لټه کې دي.
د افغانستان د خبریالانو مرکز په هېواد کې د طالبانو له خوا د رسنیو آزادۍ د سختې ځپنې د پایلو په اړه خبردارۍ ورکړی او له دې ډلې یې غوښتي، چې د خبریالانو او رسنیو حقونو او آزادیو ته درناوی وکړي.
