د افغان نیوز خبري آژانس خبریال مهدي انصاري ته نېږدې سرچینې وايي، چې انصاري له یوه کال او شپږ میاشتې بند وروسته د طالبانو له زندان نه خوشی شوی دی.
رخشانه: یوې سرچینې د هویت پټ ساتلو سره رخشانې رسنۍ ته ویلي، انصاري دېره ورځ (چهارشنبې د کب ۲۷ مه) د طالبانو له زندانه خوشی او کور ته ستون شوی دی.
د افغان خبري آژانس خبریال مهدي انصاري، د تېر کال تلي میاشتې په ۱۴مه نېټه له کاري دفتر څخه د ستنېدو پر مهال، د کابل لوېدیځ پل خشک په سیمه کې د طالبانو د استخباراتو له خوا ونیول شو.
طالبانو دغه خبریال د «نظام ضد تبلیغ» په نور په یوه نیم کال بند محکوم کړی وو. د دې خبریال محکمه له مدافع وکیل پرته تر سره شوې وه.
طالبانو په تېرو کابو پنځو کلونو کې پر رسنیو او رسنیزو فعالیتونو د سختو محدودیتونو لګولو سره، لسګونه خبریالان او د رسنیز کارکوونکي نیولي او زنداني کړي دي.
د افغان خبریالانو د مرکز د شمېرو له مخې، لږ تر لږه شپږ خبریالان، په کابل، غزني او پروان کې د طالبانو په زندانونو کې دي.
تېره ورځ د افغانستان د خبریالانو مرکز په یوه راپور کې لیکلي وو، چې د طالبانو تر واک لاندې افغانستان کې تېر یوه کال کې له رسنیو له خپلواکۍ سرغړونې ۲۰ سلنه زیاتې شوې دي.
د خبریالانو د مرکز په راپور کې راغلي، طالبانو په تېر یوه کال کې پر رسنیو کنټرول زیات کړی او په هېواد کې د رسنیو ځپل او سانسور په بېمخینې توګه زیاتوالی موندلی دی.
د دې راپور پر اساس، په ۱۴۰۴ کال کې لږ تر لږه ۲۰۷ ځلې د رسنیو له آزادۍ سرغړونې او د خبریالانو په وړاندې تاوتریخوالی ثبت شوی، چې په کې د دوه خبریالانو وژل کېدل، د یوه خبریال ټپي کېدل، ۱۸۳ ځلې ګواښل، ۲۱ ځلې د خبریالانو او رسنیزو فعالانو نیول شامل دي.
