طالبانو د روانۍ اوونۍ په اوږدو کې په کابل او زابل ولایتونو کې په بېلابېلو تورونو ۲۸ تنه په دورو وهلي دي.
رخشانه: دغه کسان، د الکولي مشروباتو او نشه کوونکو ګولیو د پېر، پلور او قاچاق، غلا او لواطت په تورونو په دورو وهلي دي.
یکشنبې (د کب ۲۴ مه) ۲۱ تنه د الکولي مشروباتو او نشه کوونکو ګولیو د پېر، پلور او قاچاق په تورونو په کابل کې له ۱۰ تر ۳۹ دورو وهل شوي دي.
دغه کسان د محکمې د پرېکړې له مخې له اوو میاشتو تر څلورو کلونو په تنفذي بند هم محکوم شوي دي.
دوشنبې (د کب ۲۵ مه) اوه تنه د غلا او لواطت په تور د زابل په شاجوی ولسوالۍ کې د خلکو په وړاندې له ۲۰ تر ۳۰ دورو وهل شوي دي.
دا کسان د محکمې د پرېکړې پر اساس له اتو میاشتو تر درې کلونو په تنفذي بند هم محکوم شوي دي.
طالبانو تېره اوونۍ په نهو ولایتونو کې د اوو ښځو په ګډون ۵۰ تنه د بېلا بېلو تورونو له امله په عام محضر کې په درو وهلي وو.
سره له دې، چې د بشري حقونو سازمانونو او فعالانو د خلکو په وړاندې بدني سزواې د انساني اصولو خلاف بللې او هغه یې غندلې، خو طالبانو په خپله پنځه کلنه واکمنۍ کې د ښځو په ګډون سلګونه تنه د خلکو په وړاندې په دورو وهلي او لږ تر لږه ۱۲ تنه یې په دې موده کې اعدام کړي دي.
