د ماشومانو د خوندیتوب سازمان (save the Children) اعلان کړی، چې د طالبانو او پاکستان تر منځ د جګړې اوږدېد د ماشومانو د زیانمنولو لامل کېږي.
رخشانه: دې بنسټ پرون ناوخته (چهارشنبې د کب ۲۷ مه) په یوه اعلامیه کې، کابل کې د روږدو کسانو د درملنې په مرکز د پاکستان برید ته په اشارې ویلي «غیرنظامیان چې د مراقبت په لټه کې دي، هېڅ وخت باید په جګړو کې ښکېل نه کړای شي.»
د ماشومانو د خوندیتوب سازمان د افغانستان څانګې مدیر بوجار خوجه ویلي دي: «دا یو ناروین زېږونکی کار دی، چې کابل کې د درملنې یو مرکز، هغه ځای چې خلک د مرستې لپاره هلته ورځي، تر برید لاندې راشي.»
هغه زیاته کړې، کله چې تاوتریخوالی د درملنې تر مرکزونو او پټنځایونو رسېږي، دا د هغه کسانو د خونتدیتوب په برخه کې لویه ماتې ده، چې لا زیات په خطر کې دي.
د ماشومانو د خوندیتوب سازمان د افغانستان څانګې مدیر ټینګار کړی چې «که جګړې دوام وکړي، ماشومان به لومړني کسان وي، چې ان تر هغه څه چې تر اوسه یې زغملي دي، زیات کړاو وکاږي.»
هغه ویلي، د جګړې ښکېلې خواېې مسوولیت لري، چې په جګړو کې له ماشومانو ساتنه وکړي.
دغه سازمان د جګړې د سمدستي درېدو غوښتنه کړې وايي، له تاوتریخوالي او ټولو سرغړونو د ماشومانو د ساتنې یوازینۍ لار د هغوی د حقونو خوندي کول دي.
دې بنسټ د دوشنبې په شپه کابل ښار کې د روږدو د درملنې په امید مرکز د برید په اړه ویلي، د دې برید د مرګ ژوبلې څېړنې روانې دي.
طالبانو ادعا کړې، چې د کابل ښار د څرخي پله په سیمه کې د امید په نوم د روږدو د درملنې په مرکز د پاکستان په هوايي برید کې شاوخوا ۴۰۰ تنه وژل شوي او ۲۵۰ نور ټپیان شوي دي.
خو د پاکستان دولت له برید وروسته اعلان وکړ، چې دوی د پاکستاني طالبانو ټي ټي پي اړوند نظامي مرکز او د وسلو زېرمتون په نښه کړی دی.
دې برید د سیاسي څېرونو او بشري حقونو د بنسټونو پراخ غبرګونونه راپارولي دي.
