په هېواد کې د ښونیز کال له پیل سره سم، د افغانستان د چارو لپاره د برېتانیا ځانګړي استازي ریچارد لیندسي ویلي، له زده کړو د نجونو محرومول د هېواد راتلونکې ته زیان رسوي.
رخشانه: لیندسي نن (دوشنبې د وري ۳ مه) په خپله اېکس پاڼه د یوه پوسټ په خپرولو سره لیدلي، په افغانستان کې د ښوونیز کال په پیل سره، میلیونه نجونې یو ځل بیا د زده کړې له حق څخه محرومېږي.
هغه لیکلي، «له زده کړو د نجونو او ښځو محرومول، د هېواد راتلونکې ته زیان رسوي، او افغاني ټولنه شاه ته پاتې ساتي.»
د افغانستان د چارو لپاره د برېتانیا ځانګړي استازي ټینګار کړی، چې زده کړې ته باید ټول لاس رسی ولري.
دا پنځم کال دی، چې افغان نجونې نه شي کولی ښوونځي ته لاړې شي.
د افغانستان د بشري حقونو لپاره د ملګرو ملتونو ځانګړي استازي ریچارد بنټ او په افغانستان کې د اورپايي ټولنې دفتر هم، په هېواد کې د نجونو د ښوونځیو په پرانستل کېدو ټينګار کړی دی.
د طالبانو د ډلې مشر د ۲۰۲۱ کال د سپټمبر په ۱۷ مه د یوه فرمان په ترڅ کې په ټول هېواد کې له شپږم ټولګي پورته نجونو پر مخ د ښوونځیو دروازې وتړلې. له دې امر وروسته ۱۶۴۴ ورځې کېږي، چې طالبانو په ټول هېواد کې له شپږم ټولګي پورته نجونو پر مخ د ښوونځیو دروازې تړلې دي.
دې ډلې په تېرو څه باندې څلورو کلونو کې له شپږم ټولګي پورته نجونو پر مخ د ښوونځیو پرانستلو لپاره کوم ګام نه دی پورته کړی او په پوهنتونو کې یې د نجونو د زده کړې ممنوعیت هم پای ته نه دی رسولی.
