کونړ کې سیمه سیمه ییزه سرچینې وايي، د نورستان کامدېش ولسوالۍ کې یوه روغتیاپاله او زوی یې د پاکستاني ځواکونو په مخامخ ډزو کې وژل شوي دي.
رخشانه: د دې روغتیاپالې دوه تنه نېږدې خپلوان وايي، هغه او ماشوم یې د تېرې اوونۍ (د کب ۲۸ مه) پنشنبې د کوچیني اختر په لومړۍ ورځ وژل شوي دي.
د دې روغتیاپالې خاوند نجیب الله وايي، مېرمن یې سحر جواني نومېده او د نورستان ولایت د کامدېش ولسوالۍ د منډګل په کلیوالي روغتیايي مرکز کې یې کار کاوه.
د نوموړي په وینا، دغه پېښه هغه مهال رامنځ ته شوې، چې مېرمن او ماشوم یې له نورستان څخه د کونړ په لور روان وو.
دی وايي، مېرمې او ماشوم یې غوښتل، د اختر په ورځو کې د خپلې کورنۍ تر څنګ وي، خو د لارې په اوږدو کې د پاکستاني ځواکونو له خوا تر برید لاندې نیول کېږي او وژل کېږي.
د دې روغتیايي کارکوونکې ورور بهارعلي هم ویلي، پاکستاني ځواکونو لومړۍ د ده د خور په موټر ډزې کړې، چې له امله یې موټر سیند ته لوېدلی دی.
نوموړې زیاته کړې، سیند ته د موټر له لوېدو وروسته یې خور غوښتل، چې ماشوم یې له اوبو وژغوري، خو پاکستاني ځواکونو بیا پرې ناتار ډزې کړې او دواړه یې وژلي دي.
د دې روغتیاپالې او د زوی جسدونه یې له ۴۸ ساعتونو وروسته، د سیمې د مخورو په هڅو د نورستان له کامدېش ولسوالۍ څخه کونړ ته لېږدول او پرون (یکشنبې د وري ۲ مه) خاورو ته سپارل شوي دي.
تر اوسه نورستان کې سیمه ییز طالب چارواکو په دې اړه څه نه دي ویلي.
د یادونې ده، چې د طالبانو او پاکستان تر منځ نښتې له تېرو څلورو اوونیو راهیسې دوام لري. په دې موده کې د ښځو او ماشومانو په ګډون لسګونه کسان په دې جګړو کې وژل شوي او یا هم ټپیان شوي دي.
