په هېواد کې د نوي ښوونیز کال له پیل سره سم، د افغانستان د بشري حقونو لپاره د ملګرو ملتونو ځانګړي راپور ورکوونکي ریچارد بنټ او د اروپايي ټولنې دفتر د نجونو پر مخ د ښوونځیو پر پرانستو ټينګار کړی دی.
رخشانه: ښاغلي بنټ تېره ورځ (یکسشنبې د وري ۲ مه) په خپله اېکس پاڼه د یوه پوسټ په خپرولو سره لیکلي، په افغانستان کې د نجونو د زده کړو محدودیت «د نه منلو» دی. بنټ د افغانستان خلکو ته د نو روز مبارکي ویلي زیاته کړې یې ده «یوازې په افغانستان کې دا یوه بل نوي ښوونیز کال پیل دی، چې له شپږم ټولني پورته نجونې ښوونځي ته او ښځې پوهنتون ته د تګ اجازه نه لري.»
د ملګرو ملتونو ځانګړي راپور ورکوونکي دې محدودیتونو ته په اشارې ویلي «دا د نه منلو ده او باید لغوه شي.»
افغانستان کې د اروپايي ټولنې دفتر هم د نورو په مناسبت په خپله اېکس پاڼه لیکلي، «د نوي ښوونیز کال په پیل کېدو سره، په لېوالتیا سره هغه ورځې ته سترګې په لار یو، چې هر نجلۍ بېرته خپل درس ته وګرځي.»
د هېواد پخواني ولسمشر حامد کرزي هم د کوچیني اختر او نورو په مناسبت په هېواد کې د نجونو د ښوونځیو په پرانستلو ټینګار کړی دی.
هغه په خپله اېکس پاڼه لیکلي، «د نوي ښوونیز کال پیل ته په پام، اړتیا ده، چې د هېواد د ټولو ځوانانو پر مخ ښوونځي او پوهنتونونه پرانستل شي او کار ته د ښځو د ګرځېدو زمینه برابره شي.»
کرزي زیاته کړې، د نجونو پر مخ د ښوونځیو او پوهنتونونو له پرانستل کېدو سره «افغانستان هم پرمختګ او پرمختیا ته» رسېږي او هم «به د خپل ملي حاکمیت څخه د دفاع توان ولري.»
۱۶۴۴ ورځې کېږي، چې طالبانو په ټول هېواد کې له شپږم ټولګي پورته نجونو پر مخ د ښوونځیو دروازې تړلې دي.
د دې ډلې مشر د ۲۰۲۱ کال د سپټمبر په ۱۷ مه د یوه فرمان په ترڅ کې په ټول هېواد کې له شپږم ټولګي پورته نجونو پر مخ د ښوونځیو دروازې وتړلې.
دې ډلې په تېرو څه باندې څلورو کلونو کې له شپږم ټولګي پورته نجونو پر مخ د ښوونځیو پرانستلو لپاره کوم ګام نه دی پورته کړی او په پوهنتونو کې یې د نجونو د زده کړې ممنوعیت هم پای ته نه دی رسولی.
