د سره صلیب نړیوالې کمېټې (ICRC) اعلان کړی، چې په افغانستان کې د اوبو بحران مخ پر زیاتېدو دی او ښځې او ماشومان د دې بحران ډېر بار پر اوږو وړي.
رخشانه: دې بنسټ نن (دوشنبې د وري ۳ مه) د اوبو د نړیوالې ورځې سره سم په یوه اعلامیه کې لیکلي، چې په کال ۲۰۲۵ میلادي کې یې له ۹۳۵ زره زیاتو کسانو ته روغو اوبو ته د لاسرسي زمینه برابره کړې ده.
د سره صلیب نړیوالې کمټې ویلي، په افغانستان کې د اوبو بحران مخ پر زیاتېدو دی او ډېری کورنۍ لا اړ دي، چې د اوبو موندلو لپاره په ساعتونو پلی مزل وکړي.
دې بنسټ لیکلي، په افغانستان کې ورځ تر بلې اوبو ته لاسرسی سختېږي، لګښت او مدیریت یې پېچلی کېږي. د اوبو کمښت د خلکو په ورځي ژوند، استوګنې او روغتیا اغېز کوي.
د سره صلیب په اعلامیه کې راغلي، په کلیوالي سیمو کې اوږدمهاله بحرانونه او پخوانۍ شخړې، د وچکالۍ، باران د کمښت، د نفوس چټکه وده، د ګاونډیو هطوادونو څخه د کډوالو بېرته راستنېدل او د ځمکې لاندې اوبو د کچې ټیټېدلو، په څاګانو او کاریزونو باندې لوی فشار راوړی دی.
د اعلامی له مخې ډېری کورنۍ د ځمکې د سر په ناپاکو اوبو متکي دي او یا هم د خپلو لومړنیو اړتیاوو د پوره کولو لپاره اوږده واټونونه وهي، په دې منځ کې ښځې او ماشومان د دې ډېر بار زغمي.
سره صلیب ویلي، د کابل، مزارشریف او کندهار په څېر ښارونه هم د ورته فشارونو سره مخ دي. د نفوس چټکه وده، د کډوالو راستنېدل او د ځمکې لاندې اوبو سره ناسم چلند، د اوبو د ټیټېدو لامل شوې او کورنۍ تر ډېره د څاه ګانو او ټانکرونو په اوبو پورې تړلي دي.
د سره صلیب نړیوالې کمېټې پاکو اوبو ته د خلکو د ښه لاسرسي لپاره د بېړني ګام پورته کولو غوښتنه کړې ده.
په افغانستان کې د ملګرو ملتونو د سیاسي استازولۍ دفتر (یوناما) هم د اوبو نړیوالې ورځې سره سم په یوه اعلامیه کې لیکلي، د کابل ښار کابو ۸۰ سلنه اوسېدونکي د خپلو ورځنیو اوبو د برابرولو لپاره په څاه ګانو پورې تړلي دي.
یوناما لیکلي، د ډېری کورنیو لپاره پاکو اوبو ته لاسرسی هم ستونزمن او هم لوړ لګښتی شوی او ځینې ښاریان خپله میاشتنې ګټه ۳۰ سلنه د اوبو په برابرولو لګوي.
په افغانستان کې د ملګرو ملتونو سیاسي استازولۍ ویلي، ښځې او ماشومان په ساعتونو په لیکو کې ولاړ وي یا اوږدې لارې پلې وهي، تر څو اوبه لاس ته راوړي.
