په افغانستان کې د روغتیا نړیوال سازمان (WHO) ویلي، افغان ښځې او ماشومان د هغو کسانو له ډلې دي، چې د نرۍ رنځ (سېل) له ناروغۍ څخه یې ډېر زیان لیدلی دی.
رخشانه: دې بنسټ نن (سه شنبې د وري ۴ مه) د نرۍ رنځ نړیوالې ورځې سره سم په خپله اېکس پاڼه لیکلي، دا ناروغي لا هم په افغانستان کې د روغتیا لپاره یو له جدي ګواښونو څخه ده.
د دې سازمان په وینا، هر کال زرګونه کسان په نري رنځ ناروغۍ اخته کېږي.
یاد بنسټ لیکلي، په نري رنځ اخته د ډېری کسانو لا هم ناروغي نه ده تشخیص شوې.
د روغتیا نړیوال سازمان زیاته کړې «نری رنځ د درملنې وړ دی او په وخت اقدام کول د انسانانو ژوند ژغوري او د دې ناروغۍ پر وخت تشخیض خورا مهم دی.»
دې سازمان د دې ناروغۍ د ژر تشخیص او درملنې ته د لاسرسي لپاره د ډلیز اقدام کولو غوښتنه کړې وايي، باید ډاډ تر لاسه شي، چې هېڅوک له پامه نه غورځول کېږي.
نری رنځ یا تبرکلوز د طالبانو تر واک لاندې افغانستان کې یو جدي روغتیايي ستونزه ګڼل کېږي. د راپورونو له مخې هر کال سلګونه کسان په هېواد په دې ناروغۍ اخته کېږي.
