طالبانو روانه اوونۍ بلخ او کابل ولایتونو کې د دوه ښځو په ګډون شپږ تنه، د بېلا بېلو تورونو له امله د خلکو په وړاندې په دورو وهلي دي.
رخشانه: دغه کسان، د الکولي مشروباتو د پېر او پلور، نامشروع اړیکو او له کوره د تېښتې په تورونو، په دغه دوه ولایتونو کې په دورو وهلي دي.
سه شنبې د (وري ۴ مه) د یوې ښځې په ګډون درې تنه د الکولي مشروباتو د پېر او پلور، نامشروع اړیکې او له کوره د تېښتې په تورونو، په بلخ او کابل ولایتونو کې د خلکو په وړاندې په دورو وهل شوي دي.
یو تن د الکولي مشروباتو د پېر او پلور په تور، د بلخ ولایت مرکز مزارشریف ښار کې د خلکو په وړاندې ۳۹ دورې وهل شوي دی. معلومه نه ده، چې دې کس ته څومره موده د بند سزا اورول شوې ده.
د یوې ښځې په ګډون دوه تنه د نامشروع اړیکې او له کوره د تېښتې په تور، د کابل چهارآسیاب ولسوالۍ کې د خلکو په وړاندې ۳۹ دورې وهل شوي دي.
دا کسان د طالبانو د محکمې د پرېکړې له مخې، په یوه کال او یوه کال او شپږ میاشتو تنفذي بند هم محکوم شوي دي.
چهارشنبې د (وري ۵ مه) د یوې ښځې په ګډون دوه تنه د نامشروع اړیکې او له کوره د تېښتې په تور، د بلخ ولایت په زارې ولسوالۍ کې، د خلکو په وړاندې ۳۵ دورې وهل شوي دي.
دې کسانو ته د طالبانو د محکمې د پرېکړې له مخې، له دوه تر پنځو کلونو پورې د تنفذي بند سزا هم اورول شوې ده.
پنشنبې د (وري ۶ مه) یو تن د نامشروع اړیکو په تور، د کابل ولایت چهارآسیاب ولسوالۍ کې، د خلکو په وړاندې ۳۹ دورې و وهل شو او په دوه کاله تنفذي بند هم محکوم شو.
د روادارۍ د بشري حقونو بنسټ د طالبانو تر واک لاندې افغانستان د بشري حقونو د وضعیت په اړه تېره ورځ په یوه راپور کې لیکلي، دې ډلې د ۲۰۲۵ میلادي کال په اوږدو کې، د ۱۱۴ ښځو په ګډون لږ تر لږه ۸۵۷ تنه د هېواد په بېلا بېلو برخو کې، د خلکو په وړاندې په دورو وهلي دي. دغه شمېرې د تېر میلادي کال په پرتله ۶۳.۵ سلنه زیاتوالی ښيي.
د دې بنسټ د راپور له مخې، طالبانو په دې موده کې لږ تر لږه ۶ تنه، په څلورو ولایتونو د خلکو په وړاندې اعدام کړي دي.
سره له دې، چې د بشري حقونو بنسټونو د افرادو بدني سزاوې او اعدامونه د بنسټیزو بشري اصولو خلاف بللي او هغه یې محکوم کړي دي، خو طالبانو بیا هم د خلکو په دورو وهلو ته دوام ورکړی دی.
