د بشري حقونو څار ډلې (Human Rights Watch) وايي، کابل ښار کې د روږدو د درملنې په «امید» مرکز د پاکستان هوايي برید «غیرقانوني او ښايي جنګي جرم وي.»
رخشانه: دې بنسټ پرون (جمعه د وري ۷ مه) په اعلامیه کې لیکلي، دا برید باید هر اړخیز وڅېړل شي او مسوول کسان یې تر څار لاندې ونیول شي.
طالبان ادعا کوي، چې د کابل ښار څرځي پله سیمه کې د روږدو د درملنې په «امید» مرکز د مارچ په ۱۶ مه د پاکستان په هوايي برید کې شاوخوا ۴۰۰ کسان وژل شوي او ۲۵۰ نور ټپیان شوي دي.
خو پاکستان ادعا کړې وه، چې دې برید کې يې د پاکستاني طالبانو یا ټي ټي پي نظامي مرکز او د وسلو زېرمتون په نښه کړی دی.
د بشري حقونو څار ډلې لیکلي «نړیوالو بنسټونو راپور ورکړی، چې لږ تر لږه ۱۴۳ تنه وژل شوي او له ۲۵۰ زیات ټپیان شوي، چې ډېری یې ناروغان وو.»
دې بنسټ ټينګار کړي، پاکستاني چارواکي باید سمدستي او بې پرې دا پېښه وڅېړلي او مسوول کسان تر تعقیب لاندې ونیسي.
د بشري حقونو څارډلې د آسیايي برخې مرستیال مدیر ویلي «شواهد ښيي، کابل کې د روږدو د درملنې په مرکز د پاکستان هوايي برید، چې لسګونه ناروغان په کې وژل شوي، غیرقانونی دی.»
د بشري حقونو د څار ډلې د «امید» د روږدو د درملنې مرکز د یوه کارکوونکي له قوله ویلي، د برید پر مهال په دې مرکز کې له ۱۰۰۰ زیاتو کسانو شتون درلوده، خو کره شمېره یې معلومه نه ده، ډېری ناروغان د روژه ماتي لپاره خوړنتون کې وو.
دې بنسټ زیاته کړې، په دې برید کې ډېری کسان په داسې ډول سوځېدلي، چې د پېژندنې نه وو او افغانستان کې د کمزور جوړو شویو ودانیو او د DNA د وړتیا د نشتوالي له امله یې پېژندل ګران دي.
د بشري حقونو څار ډلې ویلي، د بشردوستانه نړیوالو قوانینو سره سم، د جګړې ښکېلې خواوې باید په نظامي عملیاتو کې له ملکیانو ساتنه وکړي، روغتونونه او روغتیايي مرکزونه له ځانګړي ملاتړه برخمن دي.
دا بنسټ وايي، هېڅ داسې لاسوند نشته، چې له دې مرکز نه نظامي ګټه اخیستل شوې وي او دا برید امکان لري یو غیر قانوني برید وي. دا ډول سرغړونې که قصدي یا د بې پروایۍ له امله شوې وي، کېدای شي جنګي جرم وګڼل شي. د نړیوالو قوانینو سره سم، پاکستان اړ دی، چې دا پېښه وڅېړي او عامیل یې ځواب ویلو ته راکاږي.
له برید دوه اوونۍ وروسته، لا هم د مرګ ژوبلې کره شمېره نه ده خپره شوې. طالبانو دوه ورځې وړاندې د دې پېښې، د یو شمېر وژل شویو کسانو جسدونه کابل کې خاورو ته وسپارل.
