غزني کې د طالبانو امنیه قومانداني وايي، د دې ولایت خوګیاڼو ولسوالۍ کې د ماین چاودنې دوه ماشومان وژلي او دوه نور یې ټپيان کړي دي.
رخشانه: دا پېښه پرون (جمعه د وري ۷ مه) د غزني د خوګیاڼو ولسوالۍ په «علي خان خېل» کلي کې رامنځ ته شوې ده.
غزني کې د طالبانو امنیه قوماندانۍ په یوه خبرپاڼه کې لیکلي، دا پېښه د ماشومانو د بې پروایۍ له امله رامنځ ته شوې ده.
خبرپاڼه کې د دې پېښې د وژل شویو او ټپي ماشومانو د هویت، عمر او جنسیت په اړه څه نه دي ویل شوي.
د پېښې ټپیان د غزني ملکي روغتون ته د درملنې لپاره لېږدول شوي دي. د ټپیانو د روغتیايي حالت په اړه هم څه نه دي ویل شوي.
طالبانو د دې پېښې د رامنځ ته کېدو څرنګوالی او د چاودنې ډول نه دی ویلی.
د جګړې له دوران نه پاتې ماینونو او ناچاودو توکو په وار وار له هېوادوالو په ځانګړې توګه له ماشومانو قرباني اخیستې ده.
د ملګرو ملتونو د استازولۍ دفتر د راپور له مخې، افغانستان کې د ماینونو او ناچاودو توکو د چاودنو کابو ۸۰ سلنه قربانیان ماشومان دي.
یوناما اعلان کړی، چې افغانستان نړۍ کې د ناچاودو توکو د چاودنو له امله درېیم هېواد ګڼل کېږي.
د روادارۍ د بشري حقونو بنسټ د طالبانو تر واک لاندې د افغانستان د بشري حقونو د وضعیت په اړه، دوه ورځې وړاندې په یوه راپور کې لیکلي، چې د ۲۰۲۵ کال په اوږدو کې د ښځو او ماشومانو په ګډون لږ تر لږه ۱۶۴ تنو له جګړې د پاتې ماینونو او ناچاودو توکو په چاودنو کې وژل شوي او ټپیان شوي دي.
