هرات کې سیمه ییزې سرچینې وايي، د طالبانو امربالمعروف ځواکونو یو ځل بیا په دغه ښار کې د ښځو پر حجاب څار زیات کړی دی.
رخشانه: هرات ښار کې لږ تر لږه دوه سرچینو ویلي، په دې ښار کې د ښځو او نجونو پر حجاب څار د دې اوونۍ له پیل راهیسې زیات شوی دی.
یوې سرچینې ویلي، د طالبانو د امربالمعروف درې تنه ځري، د پرون ورځې له سهاره تر مازیګر پورې د هرات د مرکز «پنج راه آب بخش بادمرغان» د هغو زرنجو د تګ راتګ مخنیوی کاوه، چې مانتو اوغستې ښځې یې لېږدولې.
د سرچینې په وینا، دې مامورینو زرنجو چلوونکو ته خبرداری ورکړی، چې د مانتو اغوستو ښځو او نجونو له لېږدولو ډډه وکړي.
په هغه ویډیو کې چې رخشانې رسنۍ ته لېږل شوې، لیدل کېږي، چې د طالبانو د امربالمعروف ځري د زرنجو ته د کلیانو په اخیستو سره د هغوی د تګ خنډ شوي او له چلوونکو ژمنه اخلي، چې بیا منتو اغوستې ښځې پورته نه کړي.
د هرات ښار درېیمه ناحیه کې یوې د منځني عمر لرونکې ښځې ویلي، چې تېره ورځ د «معارف څلورلاري» کې د طالبانو د امربالمعروف ځریو درولې او ورته ویلي یې دي، «چې د مانتو په اغوستو سره له کوره راونوځي.»
د دې ښځې په وینا، د طالبانو د امربالمعروف مامور دې ته ویلي، چې مانتو پر ځای چادرنماز واغوندي.
طالبانو په داسې حال کې په هرات ښار په ځانګړې توګه د معارف په څلورلاري کې د ښځو او نجونو پر حجاب څار زیات کړی، چې په دې سیمه کې د ژبې د زده کړو ګڼ شمېر مرکزونه شتون لري.
د ښاریانو په باور دا محدودیتونه کولی شي ښوونیزو مرکزونو ته د زده کونکو نجونو پر تګ راتګ او حضور منفي اغېز وکړي او د هغوی تر منځ د وېرې او ترهې فضا رامنځ ته کړي.
د طالبانو د امربالمعروف ځواکونو په هرات ښار کې په وار وار د ښځو او نجونو پر حجاب د څار په زیاتوالي سره، په ښار، بازارونو، روغتونونو او دولتي ادارو کې د هغوی د شتون خنډ ګرځېدلي دي.
طالبانو د تېر کال لړم میاشت کې هرات کې دولتي ادارو او عمومي روغتونونو ته، د ښځینه کارکونکو او ډاکترانو په ګډون د بې چادرۍ ښځو د ننوتو مخنیوی کړی دي.
دې ډلې په تېرو کابو پنځو کلونو کې په وار وار په یو شمېر ښارونو کې ښځې او نجونې، د دوی د خوښې وړ حجاب نه مراعتولو له آمله نیولې او په ځینو وختونو کې یې زنداني کړې هم دي.
له ښځو او نجونو سره د طالبانو چلند په دوامداره توګه د بشري او ښځو د حقونو د فعالانو له خوا غندلي شوي او د دې ډلې چلند یې د «جنسیتي توپیر» بېلګه بللې او له نړیوالې ټولنې یې د هغې د په رسمیت پېژندلو غوښتنه کړې ده.
