هېواد کې د نوي ښوونیز کال له پیل سره سم، ملګرو ملتونو یو ځل بیا له طالبانو غوښتي، چې د نجونو پر مخ د ښوونځیو دروازې پرانیزي.
رخشانه: جینوا کې د ملګرو ملتونو دفتر نن (یکشنبې د وري ۹ مه) په اېکس پاڼه د یوه پوسټ په خپرولو سره، هېواد کې له شپږم ټولګي بره نجونو د زده کړو مخینوي ته غبرګون ښودلی دی.
دې دفتر لیکلي «له استثنا پرته هره نجلۍ زده کړې ته د لاسرسي حق لري او دا حق له هغوی باید سلب نه شي.»
ملګرو ملتونو پر دوام لیکلي، هره نجلۍ د زده کړو لپاره د امنیت، فرصت او تمې وړ ده.
دې بنسټ د زده کړې پر حیاتي رول ټينګار کړی وايي «د هېڅ ماشوم لپاره باید زده کړې ونه ځنډول شي.»
په هېواد کې د ښوونیز کال له پیل نه دوه ورځې تېرېږي، خو سږ کال هم د نورو کلونو په شان، له شپږم ټولګي بره نجونې د زده کړې حق نه لري.
طالبانو په دې کابو پنځو کلونو کې د ښځو او نجونو په وړاندې د نورو محدودیتونو سربېره، هغوی د زده کړې او تحصیل له حقه هم محرومې کړې دي. د دې محدودیتونو لګولو د نړیوالو بشري حقونو د بنسټونو غبرګونونه له ځان سره لري.
په هېواد کې د ښځو او نجونو په اساسي حقونو او خپلواکیو د دې محدودیتونو له لګولو کابو پنځه کاله وروسته، طالبانو لا تر اوسه د دې محدودیتونو څخه هېڅ یو هم پای ته نه دی رسولی.
دې ډلې پرون هرات کې دوه مدني فعالان، د نجونو په وړاندې د زده کړې محدودیت لغوه کولو د غوښتنې په دلیل نیولي. تر اوسه د هغوی د خوشي کېدو کوم خبر نشته.
