د طالبانو د پېښو سره د مبارزې اداره وايي، هېواد کې د وروستیو پنځه ورځینو ورښتونو او سېلابونو راوتلو په ترڅ کې، لږ تر لږه ۲۸ تنو ژوند بایللی او ۴۹ نور ټپيان شوي دي.
رخشانه: دې ادارې نن (دوشنبې د وري ۱۰ مه) په یوه اعلامیه کې لیکلي، دې کسانو بدخشان، تخار، بغلان، پنجشېر، کاپیسا، لغمان، ننګرهار، پکتیا، لوګر، کابل، پروان، پکتیکا، زابل، کندهار، هلمند، دایکنډي، بامیان، غور، سمنګان، سرپل، بلخ، جوزجان، فاریاب، بادغیس او هرات ولایتونو کې ژوند بایللی او ټپیان شوي دي.
د طالبانو د پېښو سره د مبارزې ادارې په اعلامیه کې راغلي، د وروستیو پنځو ورځنیو وروښتونو او سېلابونو له امله، ۵۶۷ کورونه په بشپړه او قسمي توګه او ۱۰ دوکانونه په دې ولایتونو کې ویجاړ شوي دي.
د دې ادارې په وینا، له دې طبیعي پېښو د هېواد په ۲۵ ولایتونو کې ۱۱۳۰ کورنۍ اغېزمنې شوې دي.
سرچینې زیاته کړې، ۹۳ کیلومتره سړک، ۲۰۹۱ جرېبه کرنیزې ځمکې او ۵۳ کړۍ څاګانو او د اوبو رسولو شبکو هم زیان لیدلی دی.
دې ادارې ویلي، ګرځنده ډلې د ارزونې او وضعیت ته د رسېدګۍ په موخه ساحو ته لېږل شوې دي.
له تېرو څو ورځو راهیسې د هېواد نېږدې په ټولو ولایتونو کې باران ورېږي. د باران ورېدل د سېلابونو راوتلو لامل شوي دي.
په افغانستان کې د ملګرو ملتونو د بشردوستانه مرستو د همغږۍ دفتر (اوچا) هم په یوه اعلامیه کې ویلي وو، چې بارانونو او سېلابونو راوتلو ځاني او مالي زیانونه اړولي دي.
دې سازمان، له دغو پېښو د قربانیانو کره شمېره او د اوښتو زیانونو کچې په اړه څه نه دي ویلي.
اوچا ویلي وو، چې له خپلو همکارانو او نورو بشردوستانه سازمانونو سره یو ځای د اوښتې مرګ ژوبلې، زیانونو او اړمنو ته د بېړنۍ ځواب وینې د ارزولو په حال کې دي.
