د ملګرو ملتونو کارپوهانو، د دې سازمان دفترونو ته د ښځینه کارکوونکو د ورتګ د مخنیوي او د ښځو د نه لاسرسي پر دوام اندېښنه ښودلې وايي، دا محدودیت د ښځو پر حقونو نېغ برید دی.
رخشانه: د ملګرو ملتونو کارپوهانو نن (سه شنبه د وري ۱۱ مه) په یوه اعلامیه کې لیکلي، د ملګرو ملتونو ښځینه کارکوونکې د دې بنسټ دفترونو نه پرېښودل هېڅ توجیهه نه لري. دوی ویلي: «د ملګرو ملتونو دفترونو ته ښځې له ورتګه محرومول، د ښځو پر حقونو له هغې جملې د هغوی د کار پر حق نېغ برید دی. د دې سیاست لپاره هېڅ کلتوري، دیني یا اداري توجیهه شتون نه لري.»
هغوی زیاته کړې «دا چې وسله وال [طالب] سرتېري د ملګرو ملتونو د ودانیو د دروازو مخو ته درېدلي، تر څو ښځې له ننوتلو راوګرځوي، ټکان ورکوونکې ده.»
طالبانو د ۲۰۲۵ د سپټمر راهیسې د ملګرو ملتونو ښځینه کارکوونکې، د دې بنسټ ودانیو ته له ننوتو راګرځولې دي.
دا ګام د هغو محدویتونو له ټولګې دی، چې له ۲۰۲۱ راهیسې پلي شوي او ښځې يې په منظم ډول، په عمومي خدماتو، مدني ټولنه او ډېری نورو د ګټې ترلاسه کولو ځایونو څخه لرې کړې او د هغوی اقتصادي او ټولنیز وضعیت یې لا خراب کړی دی.
د ملګرو ملتونو کارپوهانو ټيڼګار کړی، چې د دې ممنوعیت پایلې سملاسي او سخت دي.
دوی ویلي: «په داسې ټولنه کې، چې د ښځو له خوا ښځو ته د خدماتو وړاندې کول اړین دي، ژغورونکې مرستې، بشردوستانه او ملاتړي عملیات له ګډوډۍ سره مخ شوي او ښځې او نجونو تر ټولو ډېر زیان ویني.»
د ملګرو ملتونو کارپوهانو زیاته کړې «د ښځو پر حقونو د دې ممنوعیت او پراخو محدودیتونو د پلي کولو دوام، د نه منلو وړ، د نړیوالو حقونو سرغړاوی دی او د افغانستان راتلونکې سخته زیانمنوي.»
دوی د نړیوالې ټولنې له خوا د یوه محتد او اصولي غبرګون پر اړتیا ټينګار وکړ او د ملګرو ملتونو په ټولو ادارو فنډونو او پروګرامونو یې غږ وکړ، چې په افغانستان کې فعالیت وکړي، تر څو د دې محدودیت په وړاندې یو ګډ، قوي او اصولي دریځ غوره کړي.
د ملګرو ملتونو کارپوهانو ویلي، په داسې حال کې، چې ښځې په قصدي او منظمه توګه څنډې ته کړای شوې، ملګري ملتونه نه شي کولی په اغېزمنه توګه یا د خپلو ارزښتونو او منشور سره سم فعالیت وکړي.
دوی د ملګرو ملتونو له عمومي منشي وغوښتل، چې «یو همغږۍ او نړیوال غبرګون منظم کړي او په ورته وخت له غړو هېوادونو وغواړي، چې د دې محدودیتونو د لغوه کېدو لپاره بېړني او تل پاتې ګامونه پورته کړي.»
د ملګرو ملتونو کارپوهانو په پای کې ویلي، د ملګرو ملتونو د ښځینه کارکوونکو سره، چې د بشردوستانه کړنو د ساتنې، د بشري حقونو د دفاع او د افغانستان د راتلونکې د خوندیتوب لپاره کار کوي درېدل خورا مهم دي.
